“Dagiti Saniata ti Kinapudno”

“Dagiti saniata ti kinapudno.” Kasta ti panangiladawan ti maysa a surat iti sanga nga opisina dagiti Saksi ni Jehova idiay Nigeria maipapan iti dua a naisangsangayan a magasin. Agkabannuag a lalaki ti nagsurat, nga inlawlawagna:

“Nagsuratak tapno sipapasnek nga agyamanak iti panangikagumaanyo a mangisalaysay iti gistay amin nga aspeto ti inaldaw a panagbiag babaen kadagiti magasin a Pagwanawanan ken Agriingkayo!

“Agtawenak iti 17. Idi napalabas a tawen nangituyang ti maysa a lokal nga estasion ti radio iti salip iti salaysay iti tema a ‘Saan Laeng a Sekso ti Ramanen ti Ayat​—Pudno ti AIDS.’ Tunggal salaysay ket buklen ti di nakurkurang ngem uppat a gasut a sasao. Adda premio a 1,000 naira [$12.50, E.U.] a maited para iti kasayaatan a salaysay. Siempre, kinunada, rumbeng nga agsurat dagiti tattao saan laeng a tapno mangabak iti premio, no di ket, tapno adda masursuroda. . . .

“Nakasarakak iti impormasion maipapan iti AIDS kadagita a dua a magasin. No maipanggep iti ayat, nakaad-adu dagiti artikulo. Inaramatko dagiti punto iti Agriingkayo! nga Enero 8, 1979.

“Awan pay dua a bulan kalpasan nga impatulodko ti salaysayko, naipablaaken ti resulta. Iti pannakasdaawko, siak ti immuna kadagiti estado ti Cross River ken Akwa Ibom!

“Naggapu kadagiti magasin amin nga inaramatko nga impormasion. Talaga a nakaskasdaaw ta mangipapaay ni Jehova iti naintiempuan nga impormasion agpaay kadatayo iti daytoy nariribuk ken dakes a lubong. Kas pudno a Kristiano, ammotayo nga adu pay ti mairaman iti ayat ngem ti sekso laeng. Ken, siempre, ti pannakaadda iti nadalus ken moral a panagbiag salaknibannatayo kadagiti sakit a kas iti AIDS.

“Agyamanak kadakayo gapu kadagitoy a saniata ti kinapudno nga awan sardayna nga iburburayyo. Sapay koma ta itultuloy ni Jehova a bendisionan ti panagreggetyo bayat nga agtultuloykayo a mangipaay kadagitoy nagpateg a magasin.”