Libro, Libro, Libro!

“Iti panagaramid kadagiti adu a libro awan ti gibusna,” insurat ni masirib nga Ari Solomon idi ugma. (Eclesiastes 12:12) Kabayatan ti 1995 gistay maysa a libro ti naipablaak idiay Britania iti kada 580 nga umili, a pinagbalinna dayta a pagilian a kangrunaan iti lubong iti panagipablaak kadagiti baro a libro. Ti China, nga isu ti pagilian a kaaduan ti umili, ti maikadua, nga addaan 92,972 nga edision no idilig iti 95,015 iti Britania. Simmaruno ti Alemania (67,206 a libro), sa kalpasanna ti Estados Unidos (49,276), a sinaruno ti Pransia (41,234). “Ti dakkel a panangartap ti Britania iti intero a lubong ket maipagapu laeng iti pagsasao nga Ingles,” kuna ti pagiwarnak a The Daily Telegraph iti London.

Ipakita dagiti report a sumagmamano a tawenen a kumapkapuy ti panaglako iti libro, ket 80 porsiento laengen ita kadagiti adulto idiay Britania ti gumatgatang iti maysa wenno ad-adu pay a libro iti makatawen. Ngem mabasa kadi dagiti tattao ti amin a libro a gatangenda?

Ti maysa a libro nga agtultuloy a nasaknap ti pannakaiwarasna ken mabasbasa ket ti Biblia, a ti sumagmamano a pasetna wenno ti pakabuklan ket magun-odan itan iti 2,120 a pagsasao. No awan pay bukodyo a kopia, makiumankayo iti kaasitgan nga opisina ti Watch Tower Society tapno makagun-odkayo iti maysa a kopia. No adda Bibliayon, alaenyo ket sukimatenyo dagiti Nainkasuratan a reperensia nga agparang kadagiti artikulo iti daytoy a magasin. No aramidenyo dayta, matakuatanyo ti mangted-biag a pannakaammo iti Biblia.