Ti Korte Suprema ti Connecticut Itandudona Dagiti Kalintegan ti Pasiente
Idi Abril 8, 1996, intandudo ti Korte Suprema ti Connecticut, E.U.A., ti kalintegan dagiti Saksi ni Jehova nga agkedked a mayalisonan iti dara. Daytoy a desision binaliktadna ti immun-una a pangngeddeng ti nababbaba a korte.
Idi Agosto 1994, ni Nelly Vega, maysa kadagiti Saksi ni Jehova, nangrugi nga agpadara kalpasan a naipasngayna ti inauna nga anakna. Awan nagmamaayanna ti panangikagumaanda a mangpasardeng iti panagpadarana. Bayat a dumegdegdeg ti kasasaad ni Mrs. Vega, inkagumaan ti ospital ti mangala iti pammalubos ti korte a mayalisonan iti dara. Nakapirman ni Mrs. Vega iti maysa a dokumento a mangibilbilin a saan a mayalisonan iti dara wenno dagiti elemento manipud iti dara bayat ti kaaddana iti ospital, iti kasta awan aniaman a sungsungbatan ti ospital iti pagbanagan ti desisionna. Nupay kasta, inrupir ti ospital a ti inkapilitan a panangyalison iti dara agpaay a pagimbagan ti kaipaspasngay, a sigun iti ospital, kasapulanna ti inana. Maseknan met ti nababbaba a korte gapu ta, malaksid iti panagsayasay ti darana, ni Mrs. Vega ket ubing pay ken nasalun-at a babai. Iti kasta, iti laksid ti protesta ti asawa ni Mrs. Vega ken ti abogadona, nangipatungpal ti korte iti bilin ket nayalisonan.
Idi agangay, naidatag ti kaso iti Korte Suprema ti Connecticut. Sadiay, nagaanamonganda a kinedngan a ti inaramid ti ospital sinalungasingna dagiti kalintegan ni Mrs. Vega. Kastoy ti nailanad iti pangngeddeng: “Ti panangbista ti nababbaba a korte naaramid iti kaadalman ti rabii, iti sidong ti nakaro nga emerhensia a saan a pabor iti abilidad ti agsumbangir a partido a naan-anay a mangipaduyakyak kadagiti argumentoda.”
Daytoy a pangngeddeng ti Korte Suprema ti Connecticut ket nagpateg kadagiti tattao uray kadagiti saan a Saksi ni Jehova. “Napateg daytoy para iti amin a pasiente a di umanamong kadagiti pangngeddeng dagiti doktorda,” kuna ni Donald T. Ridley, ti abogado ni Mrs. Vega. “Ti pangngeddeng lapdanna dagiti ospital a mangyaleng-aleng iti prinsipio ti pasiente, narelihiosuan man dagitoy wenno sekular.”