Narigat a Panawen Para Kadagiti Lallakay ken Babbaket
NI Mama Oniyan, nga agtawen iti 68, ket agnanaed iti maysa a kangrunaan a siudad iti Makinlaud nga Africa. Idi agkabannuag pay, inarapaapna a tagiragsaken dagiti tawen ti kinabaketna a saanen a mangged, a sitatalinaay nga adda iti sibayna dagiti annak ken appokona. Imbes ketdi busbusbosenna dagiti aldawna iti panaglako iti nalamiis a danum a mainum iti sidong ti nabara nga init. Umanay met a pagbiagna ti bassit a masapulanna. Ti dua a babbarona agnanaed iti sabali nga adayo a pagilian. Nabayagen a tiempo a saanda a pinatulodan iti kuarta.
Kadagiti napalabas a panawen, maipatpateg unay dagiti lallakay ken babbaket idiay Africa. Mararaemda gapu iti kapadasan ken pannakaammoda, agraman ti sirib ken pannakaawat a masansan kakuykuyog dagitoy. Tumultulongda a mangpadakkel kadagiti appoko. Dagiti agkabannuag agkiddawda kadakuada iti balakad ken anamong. Agbibiag idi dagiti tao maitunos iti balakad ti Biblia: “Tumakderkanto iti sango ti ubanan nga ulo, ket dayawemto ti langa ti lakay [wenno, baket].”—Levitico 19:32.
Nagbalbaliwen ti panawen. Gapu iti kinakurapay, implasion, kinaawan-panggedan, ken nasaknap a panagakar kadagiti siudad nabati ti adu a lallakay ken babbaket a mangaywan iti bagbagida. Kastoy ti kuna ti direktor ti HelpAge Kenya, ni Camillus Were: “Maliwliwayanen ti tradision a panangsuporta ken panangaywan kadagiti lallakay ken babbaket.”
Siempre, ti panagkapuy ti singgalut ti pamilia saan laeng a maar-aramid kadagiti pagilian iti Africa. Maipanggep iti Japan, kastoy ti ipadamag ti Guardian Weekly: “Ti debosion dagiti annak ti dati a pundasion ti sistema ti pagalagadan dagiti Hapones nga impatawid ti Confucianismo, ngem nagpukawen daytoy gapu iti urbanisasion ken panagkapuy ti singgalut ti pamilia: iti agdama, 85 por siento kadagiti Hapones ti matmatay kadagiti ospital wenno kadagiti pagtaengan para kadagiti lallakay ken babbaket.”
Aniaman ti kasasaad, dagidiay pudpudno nga agtarigagay a mangay-ayo iti Dios ikagumaanda a padayawan dagiti nagannak kadakuada. Ipangagda ti balakad ti Biblia: “Dayawem ni amam ken ni inam . . . tapno aglak-amka iti naimbag ken makapagtalinaedka iti daga iti atiddag a tiempo.” (Efeso 6:2, 3) Nupay saan a kanayon a nalaka ti panangpadayaw ken panangaywan kadagiti lallakay ken babbaket a nagannak, makaiyeg daytoy iti nabaknang a gunggona.