Nagtalinaed a Birhen iti Denna ti Asawana?

ITI panangpadasda a mapagtunos ti makunkuna nga agnanayon a kinabirhen ni Maria ken ti pannakiasawana ken Jose, adu a pintor ken eskultor ti nangiladawan ken Jose kas tao a lakayen. Inkalinteganda a ni Jose iti kinapudnona, ket ad-adda a nagbalin kas mangay-aywan ken Maria imbes nga asawa. Ngem iti di pay nagbayag intandudo ni Pope John Paul II ti naidumduma a panangmatmat iti daytoy a banag. Imbagana a ni Jose ket “saan a lakay iti daydi a panawen.” Imbes ketdi, ti “makin-uneg a kinaperpektona, a bunga ti parabur, ti nangiturong kenkuana nga agbiag a katakunaynay ni Maria kas maysa nga asawa a mangipatpateg a di naaddaan iti seksual a pannakidenna kenkuana.”

No pinanggep idi ni Maria ti agtalinaed a birhen iti agnanayon, apay a nakinobio? “Nalabit,” kuna ti papa, “nga idi nagtulagda nga agkallaysa, nagtinonganen da Jose ken Maria ti maipapan iti plano nga agbiag kas birhen.”

Nupay kasta, naiduma ti ibagbaga ti Biblia maipapan iti daytoy a banag. Kuna ti salaysay ni Mateo a ni Jose “saan a nakidenna kenkuana agingga a nakaipasngay iti maysa nga anak a lalaki.” (Mateo 1:25, Catholic New American Bible, kukuami ti italiko.) Kalpasan ti pannakaipasngay ni Jesus, saan a nagtalinaed a birhen ni Maria bayat ti panagdennada ken Jose kas agassawa. Ti maysa a pammaneknek iti daytoy ket idi kamaudiananna iti salaysay ti Ebanghelio, naipakita a ni Jesus addaan kadagiti kakabsat a lallaki ken babbai.​—Mateo 13:55, 56.

Gapuna, nupay ibagbaga ti Biblia a birhen ni Maria idi impasngayna ni Jesus, awan pangibatayan iti panangibaga a nagtalinaed a birhen iti natda a paset ti panagbiagna iti denna ni Jose.