Panangaon iti “Nauneg a Danum”

KUNA ti proverbio iti Biblia: “Ti patigmaan iti puso ti tao kas nauneg a danum; ngem ti tao a mannakaawat maaonnanto.” (Proverbio 20:5) Idi panawen ti Biblia narigrigat ti pananggun-od iti danum ngem iti adu a pagilian ita. Idi kinasarita ni Jesus ti Samaritana, agsaksakdo daytoy iti ubbog ni Jacob, maysa a bubon a 23 a metro ti kaunegna!​—Juan 4:5-15.

Kas ipasimudaag ti Proverbio 20:5, ti pannakaawat a kasapulan tapno maparuar ti nauneg a kapanunotan ken rikna nga adda iti puso ti tao ket umasping iti panangikagumaan a kasapulan tapno makayaon iti danum iti bubon. Pudno daytoy iti adu a benneg ti panagbiag. Kas pagarigan, nalabit adda am-ammoyo a tattao nga iti las-ud ti adu a tawen nakaurnong iti nawadwad a pannakaammo ken kapadasan. No saan nga ugali dagitoy ti mamalakad malaksid no adda agkiddaw, mabalin a kasapulan nga aonenyo ti pampanunotda. Babaen ti panangipakita iti interes, panagsaludsod, ken nataktika a panagusisa, ibabbabayo, no ar-arigen, ti timbayo iti nauneg a bubon ti kinasirib.

Agaplikar met iti pamilia ti balakad iti Proverbio 20:5. Masansan a kuna dagiti assawa a babbai: “Saan nga ibagbaga kaniak ni lakayko ti marikriknana!” Nalabit kunaen ti asawa a lalaki: “Kasano ngamin ket dinak kasarsarita ni baketko!” Iti kakasta a situasion, kasapulan ti pannakaawat tapno mayaon dagiti nauneg a kapanunotan iti puso ti asawa. Ti nataktika a panagsaludsod (Narigatanka kadi iti daytoy nga aldaw? Ania ti napasamak? Kasanoak a makatulong?) masansan a luktanna ti puso-iti-puso a panagsarita. Ti panangipakita iti kasta a pannakaawat palagdaenna ti singgalut ti panagasawa, nga agpaay a pagimbagan ti agassawa.