Makapakarit a Sungbat

TI Catholic Herald, maysa a pagiwarnak ti Romano Katoliko iti Britania, impablaakna iti di pay nabayag ti sumaganad a surat manipud iti managbasa idiay Wales: “Maysa a rabii, immay iti pagtaengak ti dua a Saksi ni Jehova. Nasaok a ti Iglesia Katolika ti nangpasingked iti kinautentiko ti Baro a Tulag nga inadawda. Iti siddaawko, immanamong ti maysa kadakuada. ‘Wen,’ kinunana, ‘pasingkedanyo daytoy ngem diyo tungtungpalen. Kinuna ni Jesus, “ayatenyo ti maysa ken maysa kas ti panagayatko kadakayo,” ngem agpipinnataykayo. Iti napalabas a gubat, pinatay dagiti Katoliko dagiti Katoliko, ngem awan Saksi ni Jehova a pimmatay iti [padana a] Saksi.’ Ania koma pay ti aramidek no di umanamong? Kasanotay nga ikararag ti pannakipagkaykaysa kadagiti ‘naisina a kakabsattayo’ no awan met pudpudno a panagkaykaysa kadatayo? Saan kadi a rumbeng nga ilintegtay pay nga umuna daytoy a pakaibabainan?”​—Juan 15:12.

Ti dua a gubat sangalubongan iti daytoy maika-20 a siglo ket agpada a nangrugi iti Kakristianuan ket agarup 50 a milion agingga iti 60 a milion ti napapatay. Nupay kasta, sipupudno a maikuna a dagiti Saksi ni Jehova dida nakipaset kadagidiay a gubat, ken dida met makiramraman iti aniaman kadagiti panagdadangadang a mapaspasamak ita. Kasano a posible daytoy? Nasayaat no ammuenyo a naimbag ti maipapan iti nabileg a singgalut ti Nakristianuan nga ayat ken panagkaykaysa nga adda iti nasurok a lima a milion a Saksi ni Jehova iti intero a lubong.​—Idiligyo ti Isaias 2:4.

[Picture Credit Line iti panid 32]

Rinetrato ti U.S. National Archives