“Daytoy ti Kasayaatan a Magun-odan nga Interlinear a Baro a Tulag”
KASTA ti kuna ni Dr. Jason BeDuhn maipapan iti The Kingdom Interlinear Translation of the Greek Scriptures. Ilawlawagna:
“Kalkalpasko laeng ti nangisuro iti maysa a kurso para iti Religious Studies Department ti Indiana University, Bloomington, [E.U.A.] . . . Daytoy ket kangrunaanna maysa a kurso maipapan kadagiti Ebanghelio. Dimteng ti tulongyo babaen kadagiti kopia ti The Kingdom Interlinear Translation of the Greek Scriptures nga inusar dagiti estudiantek kas maysa kadagiti libro a pagadalan iti klase. Dagitoy babassit a tomo ket nagpateg iti kurso ken popular unay kadagiti estudiantek.”
Apay nga us-usaren ni Dr. BeDuhn ti patarus a Kingdom Interlinear kadagiti kurso nga isursurona iti kolehio? Insungbatna: “Iti simple a pannao, daytoy ti kasayaatan a magun-odan nga interlinear a Baro a Tulag. Maysaak a natenneb nga eskolar iti Biblia, a pamiliar kadagiti teksto ken alikamen a maus-usar iti moderno a panagadal iti Biblia, ken, wen gayam, saanak a kameng dagiti Saksi ni Jehova. Ngem ammok ti adda kalidadna a publikasion no makakitaak iti libro, ket nagsayaat ti nagapuanan ti ‘New World Bible Translation Committee[yo].’ Ti interlinear a patarusyo iti Ingles ket umiso ken agtutunos unay a manggutugot iti agbasa a mangpanunot a naimbag iti paggidiatan ti lenguahe, kultura, ken kapanunotan dagiti tattao a Griego ti pagsasaoda ken ti bukodtayo a pagsasao. Nangato ti kalidad ti ‘New World Translation[yo],’ literal ti patarusna a nangliklik kadagiti tradisional a makaallilaw a panangipaulog gapu iti panangsurotna a naimbag iti Griego. Iti adu a pamay-an, rimbawanna dagiti kababalligian a patarus a maus-usar ita.”
Ti The Kingdom Interlinear Translation of the Greek Scriptures ket impablaak dagiti Saksi ni Jehova tapno matulongan dagiti mangipatpateg iti Sao ti Dios a mangammo iti orihinal a Griego a teksto ti Biblia. Addaan daytoy iti The New Testament in the Original Greek iti kannigid a benneg ti panid (pinagtitipon da B. F. Westcott ken F. J. A. Hort). Masarakan ti literal a sao-por-sao a patarus iti Ingles iti babaen dagiti binatog ti Griego a teksto. Adda iti akikid a makinkannawan a benneg ti New World Translation of the Holy Scriptures, a mangipaay kadakayo iti gundaway a mangidilig iti interlinear a patarus iti moderno a patarus ti Biblia iti Ingles.