Report Dagiti Manangiwaragawag iti Pagarian
Panangusar iti Kada Gundaway
NALATAK iti sangalubongan dagiti Saksi ni Jehova gapu iti trabahoda a panangisuro iti Biblia. Ngem agar-aramidda met kadagiti programa a mangyeg iti dadduma pay a gunggona iti kagimongan. Maap-apresiar unay daytoy a serbisio publiko, kas ipasimudaag dagiti sumaganad a kapadasan idiay Ecuador.
◻ Kayat ti mangimanmanehar iti maysa a dakkel a pabrika ti sarming ti mangyurnos iti sumagmamano nga agsasaruno a palawag maipanggep kadagiti naimbag a prinsipio iti pamilia para kadagiti empleadoda. Inawis ti direktor ti human resources ti sumagmamano a Katoliko a papadi tapno makipaset ngem dida pinatgan ti awis. Maysa a padi ti nagkuna kenkuana a manmano a papadi ti kualipikado a mangilawlawag iti tema ket mabalin nga awan makagundaway. Idi nangngeg daytoy ti maysa nga empleado a Saksi, inyurnosna a bumisita iti pabrika ti maysa a kabsat a lalaki a masansan a mangasaba iti lugar ti pabrika.
Iti sumuno nga aldaw, indatag ti Saksi iti direktor ti human resources dagiti naisingasing a tema a maipalawag. Maysa a listaan dagiti tema ti naadaw iti nadumaduma a publikasion ti Watch Tower Society. Nasdaaw ti direktor. Nagpili iti tallo a topiko a pagsasaritaan—panangpasayaat iti pannakilangen kadagiti pada a tattao, naimbag a kababalin iti trabaho, ken naimbag a kababalin iti pagtaengan. Nayurnos a mausig ti impormasion a kadua ti amin a trabahador.
Nabingaybingay dagiti empleado iti pito a grupo a 30 ti kada grupo, sa kalpasanna tallo a kualipikado a kabsat a lallaki ti nangidatag iti impormasion kadakuada. Ania dagiti resultana? Adu kadagiti empleado ti nagkiddaw a masarungkaranda kadagiti pagtaenganda, ken 216 a pangtulong iti panagadal iti Biblia ti naipaima. Naragsakan unay dagiti mangimanmanehar ket dinawatda no mabalin a mangisagana dagiti Saksi iti maysa pay nga agsasaruno a diskurso.
◻ Iti nabiit pay, naipaulog ti linteg idiay Ecuador a mangpalubos iti relihion a maisuro iti eskuelaan. Napan ti maysa a misionera iti babai a superintendente ti elementaria ket kinomustana ti pannakaipakat ti baro a linteg iti eskuelaan. Inlawlawag ti superintendente nga adda gandatda a mangirugi iti panagdayaw ken Maria ngem saan a naipatungpal dayta. Idi nadakamat ti misionera a mabalin nga agproblema dagiti saan a Katoliko nga ubbing iti kasta a panagdayaw, immanamong ti superintendente. Kinuna ti misionera: “Nupay kasta, adda programami a mangisuro kadagiti moral a prinsipio manipud Biblia a saan a mapilit ti maysa a tao a mangakseptar iti partikular a relihion.” Kinuna ti superintendente: “Kaanokay ngay nga umay? Inton bigat-kasangaldaw?” Kalpasan nga impakita ti misionera kenkuana ti libro a Panagimdeng iti Naindaklan a Mannursuro, naikeddeng nga usigenda ti kapitulo a “Naragsak Dagiti Mamagkakappia.”
Idi nagsubli ti misionera, nangbusbos iti tallo nga oras a nangbisita iti pito a nagduduma a klase bayat a sumursurot nga agdengdengngeg ti superintendente. Kalpasan a nagsao iti klase ti maikalima a grado, kinuna ti maysa kadagiti estudiante: “Miss, pangngaasiyo ta saanyo a lablabsan a bisitaen ti maikanem a grado. Kanayondakami a saktan tapno makilabankami kadakuada!” Kinuna ti maysa a maestra: “Nagpateg a tema ti kinaranggas. Kasapulanmi ti ad-adu a panawen tapno mailawlawag daytoy.”
Nayurnos ngarud dagiti panagsarungkar iti eskuelaan tapno mapagsasaritaan dagiti tema kas iti panagtulnog ken panagulbod. Nagsayaat ti imbungana aginggana kadagitoy. Ita, no magmagna iti kalsada ti misionera, agtaray dagiti ubbing tapno kablaawanda ken pagsaludsodanda maipapan iti Biblia. Pagpannakkel nga iyam-ammo dagiti dadduma nga ubbing kadagiti dadakkelda. Mainayon pay, maysa a panagadal iti Biblia iti pagtaengan ti nairugi iti dua nga ages-eskuela nga ubbing.