Ti Kadi Panagsaoyo Makaduyok Wenno Makapaimbag?

KADAGITOY narigat a panawen, saan a makapasiddaaw nga adu dagiti “sitatarumpingay ti pusoda” ken “sibabawi ti espirituda.” (Salmo 34:18) Gapuna, kas kinuna ni apostol Pablo, kasapulan a kanayon nga ‘agsaotayo iti makaliwliwa kadagiti malmaldaangan a kararua’ ken ‘saranayentayo dagiti nakapuy.’ (1 Tesalonica 5:14) Ngem kasanon no sinaktannatayo ti padatayo a tao wenno adda nakas-ang nga inaramidna kadatayo? Iti kasta a kasasaad, mabalin nga ipapantayo a nainkalintegan laeng a pagsasawantayo dayta a tao. Nupay kasta, rebbeng nga agannadtayo. Ti balakad, uray no maiparbeng, ket makadangran no nagubsang ti pannakaisawangna. Kuna ti Proverbio 12:18: “Adda agsao a sidadarasudos a kas kadagiti panagduyok ti kampilan.”

Gapuna, no panggeptayo ti mangtubngar wenno makilinnawag, nasken a laglagipentayo ti maikadua a paset ti Proverbio 12:18: “Ti dila ti masirib makapaimbag.” Isaludsodyo a kanayon iti bagiyo, ‘No kasapulak ti pannubngar, kasano ti kayatko a pannakatrato?’ Ad-adda nga ipangag ti kaaduan kadatayo ti pammaregta ngem ti pammabalaw. Isu a naparaburkay koma a mangted iti komendasion. Masansan a daytoy ti mangparegta iti nakasair nga agbalbaliw, ket mabalin nga agyaman iti aniaman a tulong a maawatna.

Anian a nagpateg a naalumamay koma ti panagsaotayo! No makapaimbag ti sasaotayo, marikna ti kasarsaritatayo ti kas iti narikna ti salmista, a nagkuna: “No danarennak ti nalinteg, naayat a kinamanangngaasi dayta; ket no babalawennak, arigna lana iti ulok, a di kayat a pagkedkedan ti ulok.”​—Salmo 141:5, NW.