“Pagwadan ti Panagkaykaysa ken Panagkakabsat”

Kasta ti panangdeskribir ti maysa a babai iti inaramid dagiti Saksi ni Jehova kalpasan a sinagabana ti nakalkaldaang nga ipapatay ti maysa a miembro ti pamiliana. Inlawlawagna:

“Iti biangmi a sangapamiliaan, kayatko ti agyamanan kadagiti Saksi iti kongregasion dagiti Italiano idiay Freiburg, Alemania. Malaksid ken ni manongko nga Antonio ken ni Anna a baketna, saan a Saksi ni Jehova ti pamiliak. Nabayagen nga um-umsienmi ti pinilida a relihion, nupay kanayon a pagraemanmi dayta.

“Ita, nupay kasta, masapul a balbaliwanmin ti panunotmi. Kinapudnona, napadasanmi ti maysa a pagwadan ti panagkakabsat ken ayat a pulos a dimi ninamnama.

“Nakalkaldaang ta nasapa a natay ni Anna gapu iti aksidente iti kalsada. Tangay agnanaedkami idiay Italia, naliwliwami met bassit ni manongko nga Antonio ken dagiti annakna. Ngem sinaranay dagiti Saksi a kakabsatna. Natulonganda babaen iti kaaddada, sasaoda, pammatida, iti pisikal, moral, ken pinansial. Yantangay diak makapagyaman a mismo iti kongregasion, kayatko a pagyamanan ida babaen iti magasinyo gapu iti impakitada a pagwadan ti panagkaykaysa ken panagkakabsatda a pulos a diminto malipatan.”

Maapresiar dagitoy a nagsayaat a komento daytoy a babai. Kas iti napaliiwna, dagiti Saksi ni Jehova ket maysa nga internasional a panagkakabsat. (1 Pedro 2:17) Patpatanorenda ti natibker a singgalut ti ayat iti nagtetengngaanda, ta ammoda a ti ayat “ti naan-anay a singgalut ti panagkaykaysa.” (Colosas 3:14) Uray kadagiti nakalkaldaang unay a kasasaad, a mabalin nga umapay kadatayo amin, nadekket latta dagiti Saksi ni Jehova iti Dios ken iti ilina.​—Proverbio 18:24; Eclesiastes 9:11; Juan 13:34, 35.