“Salimetmetanyo ti Ik-ikutanyo”

Mangaskasaba ti maysa a grupo dagiti Saksi iti maysa kadagiti ag-30 nga isla a mangbukel iti Cyclades Islands ti Grecia. Bayat a mamalaybalay iti lansangan ti dua kadakuada, nasabatda ti maysa a polis a nangibaga kadakuada a sumurotda kenkuana idiay presinto. Apagsangpetda iti presinto, nagkiriring ti telepono. Ti padi ti purok ti nagtelepono. “Naammuak nga addada Saksi ni Jehova iti purok,” kinunana. “Wen, adda kaniak ti dua kadakuada ditoy,” insungbat ti polis. Kuna ti padi: “Umayak a dagus dita.” Medio nagdanag dagiti kakabsat iti tenor ti saritaanda.

Nupay kasta, idi dimteng ti padi, immisem, inalamanona ida, sa nagtugaw iti abay ti polis. Bayat iti panagsasaritada, nakidiskutir ti polis idinto ta ti padi ket nagtalinaed a natanang ken nadayaw. Imbagana iti polis a dina tagtagibassiten dagiti Saksi, sana innayon: “Masungbatanda ti aniaman a saludsod ta masansanayda iti Teokratiko nga Eskuelaan ti Panagministro. Nalaklaka a dadaelen ti lubong ngem ti mangbalbaliw iti pammati ti maysa kadagiti Saksi ni Jehova.”

Bayat a mangaskasabada iti kabigatanna, nakita manen dagiti kakabsat ti padi ket dinamagda kenkuana: “Apay a mannakigayyemka unay kadakami bayat ti panagsasaritatayo idiay presinto?” Kinuna kadakuada ti padi a naam-ammona ti adu a Saksi idiay Syros ken adun a tawen a basbasaenna dagiti magasin a Pagwanawanan ken Agriingkayo! Kinapudnona, iti sumagmamano a gundaway, nangirapit iti magasin a Pagwanawanan iti folder, sa inaramatna dayta iti sermonna iti simbaan. Kinunana: “Iti kunak awan mamaay ti biagko no awan dagiti literaturayo. Dayta ti panginanamaak.”

Di nagbayag, kinuna ti padi kadagiti Saksi: “Adda ibagak kadakayo. Salimetmetanyo ti ik-ikutanyo. Dikay agkamali a mangibbet iti pammatiyo. Ti ibagbagak kadakayo ita ti kasayaatan pay laeng a sermonko, ket saanko la a sasawen dayta; nagtaud dayta iti pusok.”