Baro a Biblia iti Moderno a Griego

MAYSA a naisangsangayan nga aldaw ti Agosto 23, 1997 para kadagiti nagtataripnong iti “Pammati iti Sao ti Dios” a Kombension Distrito idiay Grecia. Idi agleppas ti sesion iti malem, nairuar ti maysa a baro a Biblia​—ti New World Translation of the Holy Scriptures iti moderno a Griego. Dagiti nasorpresa nga agdengdengngeg giddato a nagluada gaput’ rag-o ken sitatakderda a nagpalpalakpak iti nabayag!

Sipud pay 1905, us-usarenen dagiti Saksi ni Jehova iti maika-19 a siglo a patarus ti Biblia nga inaramid ti Greek Orthodox a klero. Dakkel ti naitulong dayta a Biblia iti adu a tawen. Nupay kasta, kadagiti naglabas a panawen narikna dagiti Saksi ni Jehova a kasapulanda ti patarus ti Biblia a nahushusto ken nalaklaka a matarusan. Idi 1993, siraragsakda nga immawat iti Griego a bersion ti New World Translation of the Christian Greek Scriptures. Nupay kasta, napalaus ti rag-oda a maaddaan ita ti intero a Biblia iti moderno a Griego.

Inawagan ti maysa a mangipateg a Saksi ti New World Translation kas maysa a “daniw, nalamuyot a pul-oy a mangaw-awit iti timek ni Jehova, nga iti umuna a gundaway, matarusantayo a nalawag iti bukodtayo a pagsasao.” Rinugian dagiti dadduma a basaen ti baro a Bibliada apagdanonda iti pagtaenganda. Di inibbatan ti maysa a maragragsakan a kombensionista ti Bibliana agingga iti ala una ti bigat, idi a nalpasnan a basaen ti intero a libro ti Job!

Ti New World Translation of the Holy Scriptures iti Griego ket bunga ti pito a tawen a nasaet a panagbannog. Kinuna ti maysa a naipatulod a surat: “Mainanamayo a ti New World Translation dakkelto ti maitulongna kadatayo a tumulong kadagiti napasnek a tattao a mangammo iti maipapan ken Jehova.”