Dagiti Senial iti Dalan ti Biag

NO AGDALDALIASATKAYO iti saan a pamiliar a kalsada wenno dalan, ibilangyo kadi a makasinga dagiti senial? Saan! No di ket, matmatanyo ida kas katulongan tapno saankayo a maiwawa iti dalan a mangiturong kadakayo iti papananyo.

Komusta met ngay ti pannagna iti dalan ti biag? Mabalin kadi a naballigi a daliasaten dayta nga awan dagiti senial? Maysa a mammadto ti Dios idi ugma binigbigna dagiti limitasion ti sangatauan iti daytoy a banag. Kinunana: “Ammok, O APO, a dagiti dana ti tao ket saan nga iti bukodna a panagpili; wenno iti tao a mangikeddeng iti turongenna iti biag.”​—Jeremias 10:23, The New English Bible.

Gapuna, sadino ti mabalin a pakasarakan iti kasapulan a panangidalan? Ti mapagtalkan a gubuayan iti kasta a panangiwanwan isu ti Namarsua iti tao, ket dagiti piguratibo a senial masarakanda iti Biblia. Kuna ni Jehova babaen iti Saona: “Dagiti lapayagmo makangngegdanto iti maysa a sao iti likudam, a kunana, Isu daytoy ti dalan, magnakayo kenkuana; intono agbaw-ingkayo iti makannawan, ken intono agbaw-ingkayo iti makattigid.”​—Isaias 30:21.

Wen, mangipapaay iti mapagtalkan a panangidalan ti Sao ti Dios iti tunggal benneg ti biagtayo. (Isaias 48:17; 2 Timoteo 3:16, 17) Nupay kasta, nakalkaldaang ta kaaduan iti sangatauan magmagnada iti dalan ti biag nga agwaywayas manipud panangidalan ti Dios. (Mateo 7:13) Nupay kasta, dagiti senial ket naipasdekda a sititibker ken nalakada a magun-odan! Surotenyonto kadi ida bayat iti pannagnayo iti dalan ti biag?