Patien Kadi Dagiti Amin a Klero ti Isursuroda?
KAPATPATAY ti asawa ti babai. Kinuna ti padi a saan nga agdiretso idiay langit ni lakayna agsipud ta saan unay a naimbag ken saan met a maigarangugong iti umap-apuy nga impierno agsipud ta saan unay a dakes. Isu a, sigun iti padi, madusdusa ni lakayna agingga a maikari a mapan idiay langit. Binayadanna ti padi tapno ilualuanna ket al-alisto a maaon ni lakayna idiay purgatorio. Kapkapnekan daytoy ti biuda, nga impagarupna a patien met ti padi dagiti sipapasnek a patpatienna.
Iti panagkunayo, maupay ngata ti biuda no maammuanna a saan a mamati a talaga ti padi iti pannusa kalpasan ti ipapatay? Adu ti mariribukan a makaammo nga adu kadagiti klero ti saan a mamati iti adu kadagiti isursuroda a mismo. Maipapan iti inawaganna a “parikut dagiti klero a nakarkaro ngem iti sekso,” kinuna ti National Catholic Reporter: “Adu kadagiti klero ti saanen a mamati iti kaadda ti Dios wenno iti doktrina maipapan kadagiti gunggona ken pannusa wenno iti panagungar . . . ket gagangayen kadagiti klero ti kasta a di panamati, a kasla napuskol nga asuk.”
Kasta met laeng a parikut ti sangsanguen dagiti dadduma pay a relihion. Impalgak ti maysa a surbey kadagiti bikario ti Church of England nga adu “ti saan a mamati kadagiti kangrunaan a paset ti tradisional a Nakristianuan a pammati kas iti panaganak ti maysa a birhen, dagiti milagro nga inaramid ni Jesus ken ti maikadua nga iyaay ti mesias,” kas impadamag ti Canberra Times ti Australia.
Ni George R. Plagenz, maysa a mannurat iti relihion, dinamagna iti maysa a ministro no kasano a maibalikasna, buyogen ti nadalus a konsiensia, ti maysa a kredo a dina patien a mismo. Kinuna ti maysa a ministro a suktanna laeng ti panglukat a sasao ti kredo a “Mamatiak.” Kinunana: “Rugiak ti kredo babaen ti panangibagak iti kastoy, ‘MAMATIDA iti Dios Ama a Mannakabalin-amin . . .’” Inawagan ni Plagenz ti kasta a panaginsisingpet kas “kakaruan a panangallilaw iti pagilian.”
Nakalkaldaang, gapu iti kasta a di panamati ken panaginsisingpet dagiti klero, adu a tattao ti maaw-awananen iti panagtalek iti relihion. Ngem saan la a dayta ti makariribuk a benneg ti relihion ita. Maisursuro kadagiti kaaduan a mannakimisa a ti Biblia isu ti Sao ti Dios. Maklaatdanto ngata no maammuanda a saan nga isursuro ti Biblia ti dadduma kadagiti doktrina a nabayagen a patpatien ti relihionda? Usigen ti sumaganad nga artikulo ti maysa nga ehemplo.