“Datayo a Katoliko Adu ti Maadaltayo Kadakuada”

DAYTA ti kinuna ti maysa a maestra iti haiskul idiay Bari, Italy, maipapan kadagiti Saksi ni Jehova kabayatan ti klasena iti pakasaritaan ti relihion. Imbaga ti maestra iti klasena nga agaramat kadagiti videocassette kas katulongan iti panangisuro. Idi nangngeg daytoy ti maysa kadagiti estudiantena a ni Roberto, agtawen iti 18, insingasingna nga iramanda met a pagsasaritaan ti relihionna. Intukonna iti maestrana ti video a Jehovah’s Witnesses​—The Organization Behind the Name. Inawatna ti inyoprese ni Roberto, ket aminda iti klase a buklen ti agarup 30 nga estudiante binuyada ti video. “Nasdaawda amin iti panagkaykaysa, kinaurnos, ken ti nauneg nga ayat nga adda iti nagbabaetan dagiti Saksi ni Jehova,” kuna ni Roberto. “Ad-adda pay ti siddaawda idi maammuanda nga 40 a milion a kopia ti magasin a Pagwanawanan ken 36 a milion a kopia ti magasin nga Agriingkayo! ti maimalmaldit a binulan.”

“Diak impagarup a kasta ti kinaorganisadoyo,” kinuna ti sumagmamano a kaklase ni Roberto kalpasan a mabuyada ti video. Kinuna ti maestra iti klasena maipapan kadagiti Saksi ni Jehova: “Paliiwenyo no kasano a ti pammatida tignayenna ida nga agkaykaysa a naimbag ken agbalin nga organisado. Datayo a Katoliko adu ti maadaltayo kadakuada.” Ti video ken ti simmaganad a panagsasaritada iti uneg ti klase dakkel ti naitulongna iti nasaysayaat a pannakatarus kadagiti Saksi ni Jehova.