‘Natayog a kas iti Kantingen ti Libano’

AGTUBO kadagiti napipintas a bambantay ti Libano dagiti kayo a pagaammo kas Arz Arrab, kayatna a sawen, “Dagiti kantingen ti Apo.” Dagitoy nakarangranga a kayo nga evergreen, a nangabbungot idi kadagiti bambantay, ket nadakamat iti Biblia iti agarup 70 a daras​—ad-adu ti pannakadakamatna ngem iti aniaman a kayo.

Inusar ti Kasuratan dagiti sasao a “nadayag” ken “naimnas” a pangdeskribir kadagiti nangayed a kantingen ti Libano. (Kanta ni Salomon 5:15; Ezequiel 17:23) Ti kadakkel ti kantingen ken ti kalagda ti tarikayona ti namaglatak iti daytoy a pagaramid kadagiti balay ken barko ken kasta met iti muebles. Makaay-ayo unay ti ayamuom ken ti marisna a natayengteng a nalabaga, ket gapu ta natutot, saan a nalaka nga agrukop ken bukboken wenno anayen. Nakataytayag ken nakadakdakkel ti puon dagiti kayo a kantingen. Agtayag iti agingga iti 37 a metro ken ti sirkumperensiana agingga iti 12 a metro. Nauuneg ken dadakkel dagiti ramutda. Di pakasdaawan a dagiti dadduma a moderno a mangay-aywan kadagiti kabakiran aw-awaganda dagitoy kas “ti kaimnasan a dayag ti lubong dagiti mula”!

Ti mannurat ti Biblia a ni Ezequiel naimpadtuan nga inyaspingna ti Mesias iti sanga ti kantingen, a ti Dios a mismo ti nangimula. (Ezequiel 17:22) Kinapudnona, ti Hebreo a sao para iti “kantingen” ket nagtaud iti pamunganayan a sao a kayatna a sawen “agbalin a natibker.” Itatta, dagiti pasurot ti Mesias, ni Jesu-Kristo, kasapulanda met ti ‘agtakder a sititibker iti pammati, . . . bumileg,’ kas iti natayog, nalagda a kantingen. (1 Corinto 16:13) Kasano a maaramid dayta? Babaen ti sititibker a panangsaranget kadagiti di nakristianuan nga impluensia ken di maisin a panagandur iti dana ti kinatarnaw ken nadiosan a debosion. Dagidiay mangar-aramid iti kasta nailadawanda iti Biblia kas “dagiti nalinteg . . . [a] dumakkel a kas iti kantingen ti Libano.”​—Salmo 92:12, The New English Bible.