Report Dagiti Manangiwaragawag iti Pagarian
Napatgan ti Panangsapul iti Pudno a Dios
IDI maikasangapulo a siglo K.K.P., nagraira ti ulbod a panagdaydayaw iti pagarian ti Juda a buklen ti dua a tribu. Nupay kasta, iti tengnga daytoy nasaknap nga idolatria, adda lalaki a nalinteg ti panagpuspusona iti Dios. Josafat ti naganna. Kinuna ni propeta Jehu maipapan kenkuana: “Dagiti naimbag a bambanag masarakanda kenka, iti dayta, . . . impapusom ti agsapul iti Dios.” (2 Cronicas 19:3) Kasta met iti kaaldawantayo, kadagitoy “napeggad a tiempo a narigat a pakilangenan,” minilion a tattao ti ‘impapusoda’ a sapulen ti pudno a Dios a ni Jehova. (2 Timoteo 3:1-5) Paneknekan daytoy ti sumaganad a kapadasan manipud Togo, West Africa.
Nageskuela ni Casimir iti Katoliko nga eskuelaan ket nagkomulgar iti umuna a gundaway idi siam ti tawenna. Ngem, idi agtawen iti 14, nagsardengen a nakimisa ni Casimir. Daytoy ti makagapu a nagbiag a sibubuteng agsipud ta ti ammona, ti panaglanganna iti Misa agbanagto iti pannakaitapuakna iti umap-apuy nga impierno, no saan man, iti purgatorio.
Nakitimpuyog ni Casimir iti bunggoy dagiti agtutubo idiay eskuelaanda nga agadal iti Biblia maminsan iti kada lawas. Inrugina met a binasa a bukodna ti Biblia. Iti maysa a gundaway, nabasa ni Casimir iti libro ti Apocalipsis ti maipapan iti nakabutbuteng nga atap nga animal a timpuar iti baybay. (Apocalipsis 13:1, 2) Idi inyimtuodna iti lider ti grupoda nga agad-adal iti Biblia ti maipapan iti dayta, kinunana ken Casimir a pudno nga adda atap nga animal ken aktual a tuampuarto iti baybay. Naburibor ni Casimir iti daytoy nga eksplanasion gapu ta asideg iti Kosta ti Atlantiko ti pagnanaedanna. Mamati unay a nalabit maysanto kadagiti umuna a biktima ti atap nga animal.
Inrugi ni Casimir ti agurnong iti kuarta tapno makapagkamang iti desierto iti amianan ket maliklikanna ti atap nga animal. Imbagana iti maysa a kaeskuelaanna ti maipapan kadagiti panggepna. Kas maysa kadagiti Saksi ni Jehova, impatalged ti kaeskuelaanna nga awan ti kasta a literal nga animal a tumpuar iti baybay. Di nagbayag kalpasan dayta, naawis ni Casimir kadagiti gimong iti Kingdom Hall. Nagustuanna dagiti gimong ket inrugina ti tumabuno a regular. Immannugot met nga agadal iti Biblia idiay pagtaenganna.
Bayat a rimmang-ay ni Casimir iti panagadalna, nangrugi ti ibubusor ti pamilia. Agdaydayaw ti pamiliana kadagiti inapoda ken agsidsidada iti saan a napadara a karne a tedda kadagiti naidaton. Idi sidadayaw a nagkedked ni Casimir nga agsida iti karne, pinangtaanda ken pinagtalawda iti balayda. Nagtalinaed a kalmado ni Casimir, ket saan a napasamak dagiti pangta. Nupay kasta, iti las-ud ti tallo a bulan, kakasta laeng a karne ti sidsidaen ti pamilia. Narigatan ni Casimir a maaddaan iti umdas a taraon, ngem inibturanna daytoy ken dagiti dadduma pay a rigat.
Nagtultuloy ni Casimir a rimmang-ay iti naespirituan agingga a nagdedikar ken nagpabautisar. Di nagbayag, nadutokan a ministerial nga adipen ken nageskuela iti maikapat a klase ti Ministerial Training School idiay Togo. Iti agdama, tagtagiragsakenna ti boluntario a panagtrabaho iti sanga nga opisina.
Wen, namin-adun a napaneknekan a pudno ti sasao ni Ari David: ‘No birokem [ni Jehova], masarakamto.’—1 Cronicas 28:9.
[Dagiti Ladawan iti panid 8]
Tagtagiragsaken ni Casimir (kannawan) ti panagboluntariona iti sanga nga opisina