Report Dagiti Manangiwaragawag iti Pagarian
“Iti Dios Isuamin a Bambanag Mabalin”
DAGITI sasao iti ngato, a masarakan iti Mateo 19:26, ket napaneknekan a pudno iti maysa nga agtutubo a babai a taga Venezuela. Kalpasan a nasursurona ti agtalek a naan-anay ken Jehova, napagballigianna ti maysa a serioso a problema. Insalaysayna:
“Nakaim-imbag ken naayat ni apongko a baket. Makapaladingit ta natay idi 16 laeng ti tawenko. Nasaem kaniak ti ipapatayna. Napukaw ti kinasimbeng ti panunotko, a diak payen kayat ti rummuar a mapan iti paraangan iti balay. Dandaniak nagbalin nga ermitanyo.
“Saanakon a nageskuela, wenno nangged. Nagpupokak iti kuartok. Gapu ta masmasnaayanak ken awan gagayyemko, nagsagabaak iti nakaro a panagleddaang. Iti panagriknak, awan serserbik ket kayatkon ti matay tapno malpasen ti amin. Sangkaimtuodko iti bagik, ‘Apay nga agbibiagak?’
“Mangal-ala idi ni nanang kadagiti magasin a Pagwanawanan ken Agriingkayo! iti maysa nga agtutubo a Saksi nga agnagan Gisela. Maysa nga aldaw, nakita ni nanangko ni Gisela idi lumabas iti pagtaenganmi ket dinamag ni nanang kenkuana no matulongannak. Immanamong ni Gisela a padasenna, ngem nagkedkedak a sumango kenkuana. Ngem saan a naupay ni Gisela. Sinuratannak ket imbagana a kayatna ti agbalin a gayyemko ken adda pay sabali a napatpateg ngem isuna a mayat a makigayyem kaniak. Kinunana a dayta a gayyem isu ni Jehova a Dios.
“Daytoy ti nangtukay iti riknak, ket sinubalitak ti suratna. Tallo a bulan a nagsinsinnuratkami. Kalpasan laeng ti adu a “pananggutgutugot” ken “panangguyguyugoy” ni Gisela a naaddaanak iti tured a makikinnita kenkuana. Iti damo a panagkitami, inyadalannak ni Gisela iti Biblia, nga inusarna ti libro a Mabalinyo ti Agbiag nga Agnanayon iti Paraiso a Daga. Kalpasan ti panagadalmi, inawisnak a makigimong iti Kingdom Hall. Nakigtotak. Uppat a tawen a diak rimrimmuar iti pagtaengak, isu a maamakak a rummuar iti kalsada.
“Inan-anusannak ni Gisela. Impatalgedna kaniak nga awan ti rumbeng a pagbutngak ken kuyogennak a mapan iti gimong. Immannugotak met laeng. Idi dimtengkami iti Kingdom Hall, nangrugiak nga agpigerger ken agkaling-etan. Diak makakablaaw iti uray siasino. Nupay kasta, immannamongak nga agtultuloy a tumabuno kadagiti gimong, ket saan a nanglangan ni Gisela a nangdagas kaniak kada lawas.
“Tapno matulongannak a mangparmek iti nerbiosko, nakasapsapakami ken ni Gisela a mapan makigimong. Agtakderkami iti ridaw ket kablaawanmi ti tunggal sumangpet. Iti kasta a pamay-an, maysa wenno dua laeng ti makasaritak iti tunggal gundaway imbes a maysa a grupo a mammaminsan. Idi mariknak a diak maanduranen, dinakamat ni Gisela kaniak ti sasao ti Mateo 19:26: ‘Kadagiti tattao di mabalin daytoy, ngem iti Dios isuamin a bambanag mabalin.’
“Nupay narigat idi dayta, nabaelak idi agangay ti tumabuno iti dakdakkel pay a panagtataripnong dagiti tattao iti maysa nga asamblea sirkito. Anian a nagdakkel nga addang dayta para kaniak! Idi Setiembre 1995, inturturedko a kinasarita dagiti panglakayen maipapan iti pannakiramanko iti panagbalaybalay a ministerio. Innem a bulan kalpasanna, idi Abril 1996, insimbolok ti dedikasionko ken Jehova babaen ti panagpabautisar iti danum.
“Itay nabiit, idi adda nagsaludsod kaniak no kasano a naaddaanak iti tured a mangaramid iti daytoy, kinunak: ‘Napigpigsa ti tarigagayko a mangay-ayo ken Jehova ngem iti butengko.’ Nupay sagpaminsan a sumro ti panagleddaangko, maparayray ti rag-ok gapu iti panagserbik kas regular pioneer. No subliak ti napalabasko, umanamongak ken Gisela. Addan Gayyemko nga interesado kaniak ken ‘mangmangted kaniak iti pannakabalin.’”—Filipos 4:13.
[Dagiti Ladawan iti panid 8]
“Napigpigsa ti tarigagayko a mangay-ayo ken Jehova ngem iti butengko”