Nasaysayaat Ngem Kosmetiko

KALPASAN a dinakamatna dagiti “makinruar a katulongan” nga us-usaren dagiti babbai a pagpapintas, imbalakad ni apostol Pedro: “Imbes ketdi, ti pintasyo buklen koma ti napaypayso a kinataoyo, ti di agkupas a pintas ti naemma ken naulimek nga espiritu, nga isu ti kapatgan iti imatang ti Dios.”​—1 Pedro 3:3, 4, Today’s English Version.

Makapainteres ta idi nagsurat ti apostol maipapan iti kasta a makinruar a panagarkos, inusarna ti maysa a porma ti Griego a sao a koʹsmos, nga isu ti nagtaudan ti Ingles a sao a “cosmetic,” kayatna a sawen “pagpapintas nangnangruna iti kudil.” Iparparit kadi ni Pedro kadagiti Kristiano a babbai ti panagusar iti makeup ken dadduma pay nga umasping a pagpapintas? Awan ti naipasimudaag a kasta iti Sao ti Dios. Imbes ketdi, ipalubosna ti personal a pangngeddeng iti daytoy a banag, isu a manamnama ti panagduduma iti kayat.

Nupay kasta, no nalabes ti pannakausar ti makeup, wenno uray la pagalusiisenna dagiti sabsabali, ania nga impresion ti itedna? Saan kadi a kinagubsang, kinasabrak, kinaardiod, kinaparammag, wenno kinamanagimbubukodan? Kinapudnona, palaadenna ti langa ti babai, a nalabit mangipaay iti di umiso nga impresion maipapan iti katataona.​—Idiligyo ti Ezequiel 23:36-42.

Kas panangbigbig iti daytoy, pagreggetan ti babai ‘nga agkunkuna nga agraem unay iti Dios’ a, no kayatna ti agusar iti kosmetiko, ti langana iparangarangna koma dagiti tanda ti kinasimbeng iti panunot, kinaemma, kinaimbag, ken kinanumo. Papintasen dagitoy a kualidad ti libnos ken imnasna. Kinapudnona, agusar man iti makeup wenno saan, maiparangarangna ti dignidad ken makin-uneg a pintas. Iyanninaw daytoy ti pannakaammona a, kas ipamatmat ti sasao ni Pedro a naadaw iti ngato, adda nasaysayaat ngem kosmetiko.​—1 Timoteo 2:9, 10.