“Naragsakak iti Denna ti Napintas nga Asawak”
DADDUMA, adda dagiti tattao a mangakusar kadagiti Saksi ni Jehova a mangrakrak kadagiti panagasawa. Nupay kasta, dagiti nagadu a naballigi a panagasawa, uray maysa laeng kadagiti agassawa ti Saksi ni Jehova, paneknekanda nga ulbod daytoy. Ti panangipangag iti balakad ti Biblia maipapan iti biag ti pamilia paragsakenna ti panagasawa, kas ipakita ti sumaganad a surat a naipablaak iti maysa a pagiwarnak a Pranses.
“Iti agarup 28 a tawenen, naragsakak iti denna ti napintas nga asawak a maysa kadagiti Saksi ni Jehova. Pinadakkelna buyogen iti padapada a panangaywan ken kasta unay a panagayat ti lima a putotko, a dua kadagita ti siumanna. Kas agdama a direktor ti maysa a kompania nga addaan 45 nga empleado, ipasiguradok kadakayo a dakkel ti naitulongna iti panagballigi ti propesionko. Isu nga idi nakitak iti maysa nga artikulo ti pagiwarnak a regular a basbasaek a namagparang kadagiti Saksi ni Jehova kas maysa a pangta iti Lot-et-Garonne a rehion, inkeddengko nga ipaayankayo iti nabileg a pammaneknek.”
Kuna pay ti surat: “Dida agsigarilio wenno agbartek. Daytoy kadi ti makuna a pangta? Naanusda a Kristiano ket dida ipilit dagiti paglintegan a sursurotenda iti uray siasino. Imbes ketdi, mapagwadanda iti adu a pamay-an. . . . Dida maikalkalam-it kadagiti panagririri gapu iti kuarta wenno panaglako iti droga. Awan kadakuada ti panagsapata a di pulos makiasawa, ket ipasiguradok kadakayo a normal ti biagda. . . .”
“Nalabit nga isaludsodyo: Apay ngarud a saanka a maysa kadagiti Saksi ni Jehova? Gapu ta kasapulan ti Nakristianuan a pammati ken nainget a moralidad, ket saan a gagangay dagitoy iti kaaduan a tattao.”