No ‘Subaennatayo ti Angin’

Iti panangiladawanna iti pudno a napasamak kadagiti adalan ni Jesus idi naglayagda iti Baybay ti Galilea, kuna ti mannurat iti Ebanghelio a ni Marcos a “marigrigatanda iti panaggaudda, ta ti angin sumuba kadakuada.” Idi adda pay laeng iti takdang, nakita ni Jesus ti kasasaadda ket simimilagro a nagna iti rabaw ti baybay nga agturong kadakuada. Idi nakilugan kadakuada iti barangay, nagtalna ti angin.​—Marcos 6:48-51.

Dayta met laeng a mannurat iti Biblia ti nagkuna nga iti naminsan sakbay dayta a pasamak, maysa a “nadawel nga allawig ti giddato a dimteng.” Iti kasta, ni Jesus “binabalawna ti angin . . . , ket nagtalna ti angin, ket naglinak unay.”​—Marcos 4:37-39.

Nupay saantayo ita a naikkan iti gundaway a makaimatang iti kakasta a datdatlag a pasamak, adu ti maadaltayo kadagita. Kas imperpekto a tattao nga agbibiag iti napeggad a tiempo, saantay a maliklikan dagiti arig angin a pakarigatan. (2 Timoteo 3:1-5) Kinapudnona, no maminsan mabalin a mariknatayo a nalabes unay ti rigat nga itden kadatayo dagiti pakasuotan. Ngem adda madadaan a pakagun-odan iti bang-ar! Iyaw-awis ni Jesus: “Umaykayo kaniak, dakayo amin a mabambannogan ken nadagsenan, ket pagin-awaenkayto.”​—Mateo 11:28.

No kasla ‘subaennatayo ti angin,’ mabalintay a matagiragsak ti ‘nalinak unay’ a puso. Kasano? Babaen ti panagtalek kadagiti di makeltay a kari ni Jehova a Dios.​—Idiligyo ti Isaias 55:9-11; Filipos 4:5-7.