Mabalinyo nga Ammuen ti Masakbayan!

Sipapasnek nga agpampanunot ti kaaduan a tattao maipapan iti masakbayan. Kayatda ti agplano, nainsiriban nga agpuonan, ken agbalin a natalged. Ngem adda kadi pamay-an tapno masiertotayo no ania ti ipagteng ti masakbayan?

ITI panagregget dagiti tattao a mangammo no ania ti mapasamak iti masakbayan, pinadasdan ti amin a banag. Dagiti social scientist a maaw-awagan futurologist us-usigenda dagiti agdama a pasamak ket dagitoy ti pangibasaranda kadagiti padlesda. Kasta met laeng ti ar-aramiden dagiti ekonomista iti tay-ak ti ekonomia. Horoscope, bola a kristal, ken okulto ti pagpampannurayan dagiti astrologo ken mammadles, ket adu ti pasurotda. Kas pagarigan, nalatak pay laeng ti Pranses nga astrologo a ni Nostradamus, nupay sinigsiglo a natayen.

Napaneknekan a saan a mapangnamnamaan ken makapaupay amin dagitoy nga agkunkuna a mammadto. Apay? Agsipud ta dida ikabkabilangan ni Jehova a Dios ken ti Saona, ti Biblia. Gapu itoy, dida masungbatan dagiti simple a saludsod a kas kadagitoy: ‘Apay a masiertok a matungpal amin a naipadto iti Biblia? Kasano ti pannakaitunos dagitoy iti panggep ti Dios para kadagiti tattao? Kasano a magunggonaankami a sangapamiliaan kadagitoy a padto?’ Sungbatan ti Biblia dagitoy a saludsod.

Nasaysayaat met ti padto ti Biblia iti adu a dadduma pay a pamay-an. Saan a kas kadagiti padles dagiti astrologo, ipalubosna ti wayawaya ti tao nga agpili. Isu nga awan ti mabiktima iti gasat. (Deuteronomio 30:19) Dagiti surat a kas kadagiti insurat ni Nostradamus awan ilawlawagda maipapan iti moral, ket litupanda daytoy babaen ti misterio ken makapagagar a sasao. Ngem adda nabileg a moral a pagibasaran iti padto ti Biblia. Ilawlawagna no apay nga aramiden ti Dios ti pinanggepna. (2 Cronicas 36:15) Ket pulos a saan nga agkibaltang dagiti padto ni Jehova ta “ti Dios . . . dina mabalin ti agulbod.” (Tito 1:2) Isu a dagiti tattao nga agpapaiwanwan iti Sao ti Dios agbibiagda a nalawlawagan, addaan panggep, ken naragsak a di kasapulan a sayangenda ti napateg a tiempo ken sanikuada kadagiti ubbaw a raragpaten.​—Salmo 25:12, 13.

Nailawlawag dagitoy ken ti adu pay a punto iti 1999/2000 a “Naimpadtuan a Sao ti Dios” a Distrito a Kombension dagiti Saksi ni Jehova a naangay iti intero a lubong. Dagiti palawag, interbiu, demostrasion, ken ti drama a naadaw iti Biblia inturongda ti atension ti tallaong kadagiti nakaskasdaaw a naespirituan a tawid a tagtagiragsaken dagidiay agad-adal ken mangyap-aplikar iti naimpadtuan a sao ti Dios. Repasuen ti sumaganad nga artikulo ti sumagmamano kadagiti makaparagsak a tampok ti kombension.