Kasanonakayto a Lagipen ni Jehova?
“LAGIPENNAK, O Diosko.” Namin-adu nga inyararaw ni Nehemias iti Dios dagitoy a sasao. (Nehemias 5:19; 13:14, 31) Gagangay laeng nga umadani dagiti tattao iti Dios babaen kadagiti kasta nga ebkas ti panagpakpakaasi no napalalo ti rigatda.
Ngem, ania ti pampanunoten dagiti tattao no kiddawenda iti Dios a lagipenna ida? Nabatad, inanamaenda a saan laeng a lagipen ti Dios dagiti naganda. Awan duadua a namnamaenda ti kas iti ninamnama daydi maysa kadagiti kriminal a napapatay iti sibay ni Jesus. Saan a kas iti sabali, indawatna ken Jesus: “Laglagipennak inton makagtengka iti pagariam.” Saan laeng a ti pananglagip ni Jesus iti katataona ti kinalikagumanna no di pay ket kayatna nga adda aramiden ni Jesus kenkuana—isut’ pagungarenna.—Lucas 23:42.
Ipakita ti Biblia a no iti biang ti Dios, ti “pananglaglagip” kanayon a kayatna a sawen ti positibo a panagtignay. Kas pagarigan, kalpasan a nalayus ti daga iti 150 nga aldaw, “ti Dios inimatanganna [linagipna, NW] ni Noe . . . , ket pinalabas ti Dios ti maysa nga angin iti rabaw ti daga, ket nagsardeng dagiti dandanum.” (Genesis 8:1) Sinigsiglo kalpasanna, ni Samson a binulsek ken kinawaran dagiti Filisteo, immararaw: “O Apo Jehova agdawatak kenka, lagipennak, ket papigsaennak, agdawatak kenka, iti daytoy laeng a kanito.” Linagip ni Jehova ni Samson babaen ti panangtedna kenkuana iti nabilbileg ngem iti natauan a pigsa tapno maibalesanna ti bagina kadagiti kabusor ti Dios. (Oc-ocom 16:28-30) No maipapan ken Nehemias, binendisionan ni Jehova dagiti panagreggetna, ket naisubli ti pudno a panagdayaw idiay Jerusalem.
“Amin dagiti bambanag a naisurat a nasaksakbay naisuratda a pakasursuruantayo, tapno babaen ti panagibturtayo ken babaen ti liwliwa manipud iti Kasuratan maaddaantay koma iti namnama,” insurat ni apostol Pablo. (Roma 15:4) No lagipentayo ni Jehova babaen ti panangikagumaantayo a mangaramid iti pagayatanna, a kas ti inaramid dagiti matalek nga adipenna iti naglabas, makapagtalektayo a lagipennatayo ni Jehova babaen ti panangtulongna kadatayo a makagun-od kadagiti inaldaw a kasapulantayo, babaen ti panangpabilegna kadatayo kadagiti pakasuotantayo, ken babaen ti panangisalakanna kadatayo inton ukomenna dagiti nadangkes.—Mateo 6:33; 2 Pedro 2:9.