No Ania ti Il-iliwenna Idiay New York City

SIBABATAD a nakaparang daytoy a karatula iti maysa kadagiti paktoria ti Watchtower Society idiay Brooklyn, New York, sipud pay iti dekada 1950. Palagipanna dagiti biahero, turista, ken dadduma pay a lumablabas a basaenda ti Biblia iti inaldaw. Ti sumaganad a surat a naggapu iti maysa nga agtutubo a babai a Saksi ipakitana ti kinaepektibo daytoy a pammalagip.

“Pagsarsaritaanmi iti kaeskuelaak no ania ti kayatko nga aramiden no maturposko ti haiskul. Dinakamatko ti maipapan iti Bethel, ti hedkuarter dagiti Saksi ni Jehova, ket nagagaran unay. Kinunana nga idiay New York City ti dimmakkelanna. Saan unay a relihioso ti pamiliada, ngem kada bigat a tuman-aw iti tawa, makitana sadiay ti karatula nga agkuna ‘Read God’s Word the Holy Bible Daily’ (Basaenyo iti Inaldaw ti Nasantuan a Biblia a Sao ti Dios). Isu a binigat a basaenna ti Bibliana sakbay a mapan ageskuela.

“Idi pimmanawda iti siudad, kinunana a ti il-iliwenna idiay New York City isu ti dinan pannakakita kada agriing iti palagip a basaenna ti Bibliana. Ngem gapu iti karatula iti patakder ti Watchtower, nayugalinan ti agbasa iti Biblia, isu nga agtultuloy a basbasaenna ti Biblia iti inaldaw!”

Anian a nagsayaat a panangirugi iti aldaw babaen ti panangbasa iti maysa a paset ti Sao ti Dios! No aramidenyo dayta, di pagduaduaan a maapresiaryo dagitoy a sasao ni apostol Pablo: “Dagiti nasantuan a sursurat . . . [ket] makabael a mamagsirib kenka maipaay ti pannakaisalakan babaen ti pammati a mainaig ken Kristo Jesus.”​—2 Timoteo 3:15-17.