Report Dagiti Manangiwaragawag iti Pagarian

“Adu ti Ammoyo iti Biblia”

IDI situtured a nakisarita ti 12 ti tawenna a ni Jesus kadagiti panguluen ti relihion idiay Jerusalem, “amin dagidiay umim-imdeng kenkuana nagtultuloyda a masmasdaaw iti pannakaawatna ken kadagiti sungbatna.” (Lucas 2:47) Iti met kaaldawantayo, adu nga agtutubo nga agserserbi ken Jehova ti situtured a mangisarsarita kadagiti mannursuro ken kaeskuelaanda iti maipapan iti Dios ken ti Biblia, ket masansan a makaay-ayo dagiti resulta a nagun-odda.

Dakdakamaten idi ti klase da Tiffany, agtawen iti 14, ti padto ti Biblia maipapan iti 70 a lawas ti tawtawen, a masarakan iti Daniel 9:24-27. Nangted ti maestro iti sumagmamano nga impormasion mainaig kadagita a bersikulo sa pinalpasna a dagus ti suheto.

Idi damo, nagalikaka ni Tiffany a mangitayag iti imana. Kunana: “Ngem kasla alusiisenak gapu ta di nailawlawag a nalaing dagita a bersikulo. Pagammuan, intayagko ti imak.” Nasdaaw ti maestro ta adda kayatna ti agkomento iti dayta a suheto, idinto ta narigat dayta a maawatan ti kaaduan kadagiti estudiante.

Naikkan iti gundaway ni Tiffany, isu a timmakder ket siwayawaya nga inlawlawagna ti padto. Idi nalpas, nakaul-ulimek ti klase. Medio madanagan ni Tiffany. Idi kuan, nagpapalakpak dagiti kaeskuelaanna.

“Nagsayaat unay dayta, Tiffany, nagsayaat unay,” maulit-ulit a kinuna ti maestro. Inamin ti maestro nga ammona nga adda pay naun-uneg a kaipapanan dagita a bersikulo, ngem ni Tiffany ti damo a nangilawlawag a nalaing kenkuana. Idi nalpas ti klase, dinamagna ken Tiffany no apay nga adu ti ammona iti Biblia.

“Maysaak ngamin a Saksi ni Jehova,” insungbatna. “Adu a daras nga inlawlawag dagiti dadakkelko dayta a padto sakbay a natarusak.”

Nasdaaw met dagiti kaklasena iti pannakaammona iti Biblia. Kastoy ti kinuna ti maysa nga estudiante ken Tiffany: “Ammokon no apay a mapankayo a Saksi ni Jehova iti binalaybalay; gapu ta adu ti ammoyo iti Biblia.” Inkari ti dadduma a didanto uy-uyawenen gapu iti pammatina.

Idi inestoria ni Tiffany kadagiti dadakkelna ti napasamak, insingasingda nga itukonna iti maestrona ti libro a Pannakaammo a Mangiturong iti Biag nga Agnanayon. Idi inaramidna dayta ket impakitana iti maestrona ti paset a mangilawlawag iti padto ni Daniel, inawat a dagus ti maestrona ti libro ket nagyaman kenkuana.

Pudno a no situtured nga isarita dagiti agtutubo a Kristiano ti insuro kadakuada dagiti dadakkelda maipapan iti Dios ken iti Biblia, maidaydayaw ken maitan-okda ni Jehova ken mangyeg kadakuada iti bendision.​—Mateo 21:15, 16.