Naisangsangayan nga Okasion​—Tabunuanyonto Kadi?

ITI maysa a nakallalagip nga aldaw, nasurok a 3,500 a tawenen ti napalabas, imbilin ni Jehova a Dios iti tunggal sangakabbalayan dagiti Israelita a naadipen idiay Egipto a mangpartida iti kordero wenno kalding ket iwarsida ti darana kadagiti bautek ken ngatuen dagiti ruangan ti balbalayda. Iti dayta a rabii, linabsan ti anghel ti Dios ti balbalay a natandaan iti kastoy a pamay-an ngem pinapatayna dagiti inauna nga annak a lallaki nga adda iti uneg ti pagtaengan dagiti amin nga Egipcio. Kalpasanna nawayawayaan dagiti Israelita. Manipud idin, kas panglaglagip iti dayta a pasamak, tinawen a rinambakan dagiti Judio ti Paskua.

Kalpasan la unay ti maudi a panangrambak ni Jesu-Kristo iti Paskua a kaduana dagiti apostolna, nangyussuat iti maysa a pannangan a mangipalagip iti sakripisio nga ipapatayna. Impasana kadagiti apostolna ti awan lebadurana a tinapay ket kinunana: “Alaenyo, kanenyo. Daytoy kaipapananna ti bagik.” Kalpasanna inikkanna ida ti sangakopa nga arak ket kinunana: “Uminumkayo manipud iti dayta, dakayo amin; ta daytoy kaipapananna ti ‘dara[k] iti tulag,’ a maiparukpok maigapu iti adu a maipaay iti pannakapakawan dagiti basol.” Kinuna pay ni Jesus: “Itultuloyyo nga aramiden daytoy kas panglaglagip kaniak.” (Mateo 26:26-28; Lucas 22:19, 20) Gapuna binilin ni Jesus dagiti pasurotna nga itultuloyda daytoy a panglaglagip iti ipapatayna.

Iti daytoy a tawen, ti anibersario ti ipapatay ni Jesus ket maangay iti Mierkoles, Abril 19, kalpasan ti ilelennek ti init. Agtataripnong dagiti Saksi ni Jehova iti intero a lubong iti daytoy a naisangsangayan a rabii tapno rambakanda daytoy a Pananglaglagip iti pamay-an nga inkalikagum ni Jesus. Sibabaradakay nga awisen a tumabuno tapno kaduami nga agobserbar. Pangngaasiyo ta agdamagkayo kadagiti Saksi ni Jehova iti lugaryo maipapan iti eksakto nga oras ken lugar a pakaangayanna.