Panangted a Napateg iti Imatang ni Jehova

Ti sumaganad a surat ket naawat ti sanga nga opisina dagiti Saksi ni Jehova idiay Mozambique:

“Maysaak nga ubing a lalaki nga agtawen iti pito. Addaak pay la iti elementaria. Itedko daytoy 12,000 a Meticais [$1, U.S.] a naglakuak iti tinarakenko a piek. Agyamanak ken Jehova ta nagbalin a kawitan ti kaunaan a piek a tinarakenko. Maaramat koma daytoy a sagutko iti trabaho ti Pagarian ni Jehova.

“Pakamakam: Tinulongannak ni tatangko a nangbukel iti daytoy a surat.”

Ipapan ti dadduma a tattao a dagiti laeng nabaknang ti makabael nga agbalin a naparabur. Nupay kasta, no mabasatayo ti salaysay ti Biblia maipapan iti balo a babai a nangipisok iti baul ti gameng iti “dua a babassit a sinsilio a bassit unay ti pategna,” makitatayo a matukod ti kinaparabur, saan nga iti kaadu, no di ket iti umiso a motibo ti puso.​—Lucas 21:1-4.

Makaay-ayo ken Jehova ti tunggal sagut a nagtaud iti puso a ginutugot ti ayat, kasano man kabassit dayta. Ket sibabaknang a bendisionanna dagidiay mangtulad iti kinaparaburna babaen ti panangipaayda iti panawen, pigsa, wenno material a sanikuada maigapu iti Pagarianna.​—Mateo 6:33; Hebreo 6:10.