“Liklikmutekto ti Altarmo, O Jehova”
“BUGGUAKTO dagiti im-immak babaen ti kinadalus: iti kasta liklikmutekto ti altarmo, O Jehova.” (Salmo 26:6) Babaen dagitoy a sasao, inyebkas ni Ari David idi ugma ti debosionna ken Jehova. Ngem apay a ‘likmuten[na]’ ti altar ni Jehova, ken iti ania nga anag?
Para ken David, ti sentro ti panagdayaw ken Jehova isu ti tabernakulo a ti altarna a pagdatonan nakalupkopan iti gambang. Idi tiempo ti panagturayna, adda ti tabernakulo idiay Gabaon, iti amianan ti Jerusalem. (1 Ar-ari 3:4) Ti altar ket agarup 2.2 a metro kuadrado laeng. Adayo a basbassit ngem ti nadaeg nga altar a nabangon idi kamaudiananna iti paraangan ti templo ni Solomon.a Kaskasdi, naay-ayo unay ni David iti tabernakulo ken iti altarna. Daytoy ti sentro ti nasin-aw a panagdayaw idiay Israel.—Salmo 26:8.
Maidatag iti altar dagiti daton a mapuoran, daton ti pannakikappia, ken daton gapu iti salungasing, ket adda dagiti daton a maidatag iti tinawen nga Aldaw ti Panangabbong maigapu iti nasion. Adda kaipapanan ti altar ken dagiti daton kadagiti Kristiano ita. Kinuna ni apostol Pablo a ti altar irepresentarna ti pagayatan ti Dios, nga iti dayta inawatna ti maitutop a daton a pangsubbot iti sangatauan. Kinuna ni Pablo: “Babaen ti naikuna a ‘pagayatan’ nasantipikartayo babaen ti pannakaidaton ti bagi ni Jesu-Kristo a namimpinsan a maipaay iti amin a panawenen.”—Hebreo 10:5-10.
No agserbida iti altar, kaugalian dagiti padi a bugguan ti imada tapno nadalusda. Maikanatad ngarud a binugguan ni Ari David ti imana ‘iti kinadalus’ sakbay a ‘likmutenna ti altar.’ Nagtignay buyogen ‘ti natarnaw a puso ken kinasingpet.’ (1 Ar-ari 9:4) No dina binugguan ti imana iti kastoy a pamay-an, saan koma a naanamongan ti panagdayawna—ti ‘panaglikmutna iti altar.’ Siempre, saan a Levita ni David ket dina mabalin nga akmen ti trabaho dagiti padi iti altar. Nupay maysa nga ari, saan a mapalubosan uray iti paraangan ti tabernakulo. Kaskasdi, gapu ta maysa a matalek nga Israelita, tinungpalna ti Linteg Mosaiko ket regular a nangidatag kadagiti daton iti altar. Linikmutna ti altar iti anag nga impamaysana ti biagna iti nasin-aw a panagdayaw.
Matuladtay kadi ita ti ulidan ni David? Wen. Mabugguantayo met dagiti imatayo iti kinadalus ken malikmuttayo ti altar ti Dios no mamatitayo iti daton ni esus ken naimpusuan nga agserbitayo ken Jehova, buyogen ti “nadalus nga im-ima ken natarnaw a puso.”—Salmo 24:4.
[Footnote]
a Agarup 9 a metro kuadrado dayta nga altar.
[Ladawan iti panid 23]
Ti altar iladawanna ti pagayatan ni Jehova, ket iti dayta nga awatenna ti maitutop a daton agpaay iti pannakasubbot ti sangatauan