Panagtalinaed a Nasungdo ken Jehova

TI KINASUNGDO, nupay manmano a maiparangarang ita, ket galad a pakabigbigan dagiti adipen ti pudno a Dios, ni Jehova. Ti nasungdo a tao ket natibker iti sidong dagiti pakasuotan ken di maisin iti laksid ti panaglabas ti tiempo. Usigenyo ti naimbag nga ari a ni Ezekias. Kuna ti Biblia: “Kalpasanna awan idi ti kas kenkuana kadagiti isuamin nga ari ti Juda, uray kadagidi nga immun-una ngem isu.” Apay a naidumduma ni Ezekias? “Kimpet ken ni Jehova,” nupay nalikmut kadagiti agdaydayaw iti didiosen a ni Moloc. Wen, ni Ezekias “saan a pimmanaw iti isusurotna [ken Jehova], no di ket tinungpalna dagiti bilbilin [ti Dios].”​—2 Ar-ari 18:1-6.

Nagtalinaed met a nasungdo ni apostol Pablo ken Jehova. Ti rekord ti ministeriona a nailanad iti Kristiano a Griego a Kasuratan silalawag nga ipakitana ti di nagbalbaliw nga amin-kararua a panagserbi ni Pablo iti Dios. Iti arinunos ti biagna ditoy daga, naikuna ni Pablo maipapan iti bagina: “Nakirupakak iti nasayaat a dangadang, tinarayko ti tarayen agingga iti pagpatinggaan, tinungpalko ti pammati.”​—2 Timoteo 4:7.

Anian a nagsayaat a pagwadan iti kinasungdo da Ezekias ken Pablo! Tuladentay koma ti pammatida babaen ti panagtalinaedtayo a nasungdo iti Naindaklan a Diostayo, ni Jehova.​—Hebreo 13:7.