Report Dagiti Manangiwaragawag iti Pagarian
Napateg ken Jehova Dagidiay Agayat Kenkuana
TI Libano ket agdindinamag gapu iti nainkasigudan a gamengna manipud pay idi panawen ti Biblia. (Salmo 72:16; Isaias 60:13) Maipatpateg unay idi dagiti dadakkel a sedrona, a paborito unay a materiales ti patakder gapu iti pintas, ayumuom, ken kinalagdada. Idi umuna a siglo, adda napatpateg a banag a timpuar idiay Libano. Ipadamag ti Ebanghelio ni Marcos a manipud Tiro ken Sidon, iti nagkauna a sakup ti Libano, “maysa a dakkel nga umariwekwek ti immay kenkuana [ni Jesus], idi mangngegda ti kaadu dagiti bambanag nga inar-aramidna.”—Marcos 3:8.
Kasta met itatta, mangpatpataud ti Libano iti bunga a nakapatpateg iti imatang ni Jehova. Daytoy ti itampok dagiti sumaganad a kapadasan.
• Maysa nga agtutubo a Saksi nga agnagan Wissam ti nakiddaw a mangipaay iti 30-minuto a palawag iti klasena idiay eskuelaan. Napanunot ni Wissam a nasayaat a gundaway dayta tapno mangasaba. Isu nga inusarna ti libro a Life—How Did It Get Here? By Evolution or by Creation? ket maipapan iti panamarsua ti insaganana nga ipalawag. Ngem apaman a nakita ti maestro ni Wissam ti material, kinunana a gapu ta napateg dayta a suheto, mabalin nga agpalawag ni Wissam iti 45 a minuto.
Idi irugi ni Wissam ti agpalawag, pinasardeng ti maestrona ket pinaayabanna ti prinsipal. Dagus nga immay ti prinsipal, ket inrugi manen ni Wissam ti diskursona. Idi nangngeganna dagiti saludsod iti introduksion ti palawag ni Wissam, naragsakan ti prinsipal ket kinunana a rumbeng a maikkan ti amin nga estudiante iti kopia ti palawag.
Di unay nagbayag, adda sabali a maestro a lumablabas a nakadlaw iti kinaragsak dagiti adda iti siled a pagadalan ket inimtuodna no ania ti mapaspasamak. Idi naammuanna, sinaludsodna no panamarsua wenno ebolusion ti pampaneknekan ni Wissam. “Panamarsua,” insungbatda. Idi naammuanna a maysa kadagiti Saksi ni Jehova ni Wissam, kinuna ti maestro iti klase: “Makitayonto iti palawagna a supsuportaran ti siensia ti panamarsua, saan a ti ebolusion.”
Addaanen gayam ti maestro iti libro a Creation ket us-usarenna dayta no aglektiur iti unibersidad! Sakbay a pimmanaw, sinaludsodna no palubosanda nga agsubli iti sumaganad nga aldaw a kadua dagiti estudiantena tapno makapagdiskurso kadakuada ni Wissam. Nagresulta manen dayta iti nasayaat a panangsaksi ken Jehova.
• Ni Nina nga agtawen iti 22 ket mawaw iti danum ti kinapudno. Maysa nga aldaw inikkan ti kasinsinna iti Biblia ket inyam-ammona iti Pentecostal Church. Naayatan ni Nina a nangbasa iti Biblia ket naadalna iti dayta a rumbeng a mangasaba dagiti Kristiano. Gapuna rinugianna ti nakisarita kadagiti kaam-ammona. Insaludsod ti tunggal maysa kadakuada: “Maysaka kadi kadagiti Saksi ni Jehova?” Nasdaaw ni Nina iti dayta.
Innem a tawen kalpasanna, immay dagiti Saksi ni Jehova iti pagtaengan ni Nina ket impakaammoda kenkuana ti maipapan iti Pagarian ti Dios. Idi damo pinadasna ti nangbirok iti pamilawanna iti sursuroda. Ngem natakuatanna a nainkalintegan ken naibasar iti Biblia ti amin a sungbatda.
Idi agangay, dagiti naadal ni Nina—ti nagan ti Dios, a Jehova; dagiti bendision ti Pagarian; ken dadduma pay—ti nangkombinsir kenkuana a nasarakannan ti kinapudno. Indedikarna ti biagna ken Jehova ket nagpabautisar. Pito a tawenen nga agserserbi ni Nina kas maysa nga amin-tiempo nga ebanghelisador. Talaga a bendisionan ni Jehova dagidiay pudpudno a mangay-ayat kenkuana.—1 Corinto 2:9.