Nadiosan a Sirib Kasano a Maiparangarang?

“TI SIRIB ti napanglaw naumsi, ket saan a maipangag dagiti sasaona.” Kasta ti ngudo ti estoria ni masirib nga Ari Solomon maipapan iti maysa a nanumo ngem masirib a lalaki a nangsalbar iti intero a siudad manipud iti pannakaduprak. Ngem nakalkaldaang ta “awan ti tao a nakalagip iti daydi met laeng a napanglaw.”​—Eclesiastes 9:14-16.

Pagannayasan ti tattao a laisen dagiti napanglaw, uray nakaaramidda iti naimbag. Natungpal idi daytoy ken Jesus. Impadto ni Isaias maipapan kenkuana: “Isu nauy-uyaw, ken binaybay-an dagiti tattao; maysa a tao ti ladladingit, ken nakaam-ammo iti liday.” (Isaias 53:3) Inumsi dagiti dadduma ni Jesus gapu laeng ta awanan iti saad ken kinatan-ok nga adda kadagiti lider idi kaaldawanna. Kaskasdi, isut’ nasirsirib nga adayo ngem iti siasinoman a managbasol a tao. Nalawag a saan a pinati dagiti kailian ni Jesus a daytoy nga “anak ti allawagi” ket masirib ken makaaramid kadagiti datdatlag. Ngem dakkel a biddut dayta, ta kunaen pay ti salaysay a ni Jesus “saan a nagaramid sadiay iti adu a mannakabalin nga ar-aramid maigapu iti kinakurang ti pammatida.” Anian a pannakaikapis dagidiay a tattao!​—Mateo 13:54-58.

Sapay koma ta ditay agbiddut a kas kadakuada. “Ti kinasirib mapaneknekan a nalinteg babaen iti ar-aramidna,” kinuna ni Jesus. Mailasin dagidiay agar-aramid iti trabaho ti Dios ken mangipapaay iti nailangitan a sirib, saan a babaen ti saad wenno takderda iti kagimongan, no di ket gapu iti “nasayaat a bunga” nga ipakpakitada​—ti pammati ken ar-aramidda a naibasar iti Biblia.​—Mateo 7:18-20; 11:19.