“Pagwadan ti Panagkaykaysa”

KASTA ti paulo ti maysa nga editorial a naipablaak iti pagiwarnak idiay Indaiatuba, São Paulo, Brazil. Siasino dagiti pagwadan? “Dagiti Saksi ni Jehova, a nagplano a mangibangon iti baro a ‘Kingdom Hall,’ kas pannakaawag kadagiti templo wenno auditorium-da, ket nabatad a mangiparparangarang iti positibo ken napaypayso a pagwadan ti panagtitinnulong,” inlawlawag ti mannurat.

Nakakadkadlaw ti panagkaykaysa dagiti Saksi ni Jehova kadagiti kasta a gundaway. Gapuna, kinuna ti artikulo: “Makatukay iti rikna a makita dagiti nagboluntario a lallaki, babbai, ken agtutubo a situtulok nga agtrabaho a sangsangkamaysa tapno mangbangon iti pasdek a paggigimonganda ken pagdayawanda iti Dios.”

Mangipakpakita met dagiti Saksi ni Jehova iti nasayaat nga ulidan iti dadduma pay a benneg. “Malaksid iti panagadal ken panagkararag, kayatda a tulongan nga agbalbaliw dagiti alkoholiko ken adikto iti droga ken isuro kadagiti tattao ti dalan ti panagkaykaysa ken ayat,” innayon ti editorial. Kasano ti panangibanagda iti daytoy? Ammo dagiti Saksi a makalapsut ti maysa a tao kadagiti bisio no agadal ken iyaplikarna ti balakad ti Biblia. Isut’ gapuna nga ikagkagumaanda nga isuro iti dadduma dagiti naadalda iti Biblia. Inngudo ti editorial babaen ti panagkunana a ti ar-aramidenda ket “maysa nga ulidan nga awan duadua a nasken a tuladen.”

Maawis amin a tattao kadagiti gimong dagiti Saksi ni Jehova ket awan ti panagkolekta iti kuarta. Sibabara nga awisendakayo a mangbisita iti Kingdom Hall a kaasitgan iti lugaryo.