Sangalubongan a Talna—Kasano?
ASIDEG kadin ti sangalubongan a talna? Adu idi ti nangipagarup a kasta ngem agpangpangaduada itan. Sigun iti report a nangisalaysay kadagiti karit iti masanguanantayo a naipablaak iti Daily Mail & Guardian ti Abagatan nga Africa, “dagiti naipadles para iti baro nga internasional nga urnos iti napalabas a 10 a tawen ket kasla di mapangnamnamaan itan.”
Dagiti autor iti nadakamat a pagiwarnak ipalagipda ti panangnamnama dagiti tattao sangapulo a tawenen ti napalabas. Kalkalpas idi ti Cold War, ken awanen ti susik dagiti makunkuna a superpower. Gapu iti kasla panagbannawag ti baro a panawen, adu ti nangnamnama a mangrugin nga agballigi ti sangatauan a mangparmek iti kinapanglaw, sakit, ken dagiti parikut iti aglawlaw. “Kasla di mapangnamnamaan nga arapaap itan dagidi a padles,” kuna ti report. “Bimtak dagiti nabiit pay a panagrurupak kadagiti lugar a ditay impagarup; kumarkaro ti kinapanglaw iti intero a lubong. Addada dua pay a pagilian nga addaanen kadagiti nuklear nga armas. Dimmakes ti reputasion ti UN gapu ta dina kabaelan a risuten ti nagsasagadsad a riribuk iti kagimongan. Agbalbalinen a batibat ti arapaap.”
Ammo dagiti agad-adal iti Biblia a dinto pulos naan-anay nga agballigi dagiti pamuspusan ti tao, kasano man kasayaat dagita. Apay a di agballigi? Gapu ta, kas kuna ti Biblia, “ti intero a lubong adda iti pannakabalin daydiay nadangkes.” (1 Juan 5:19) Bayat nga agturturay ni Satanas, ti lubong ket saan nga agbalin a Paraiso a kas iti inranta ti Dios.
Kabayatanna, adda ti mabalintay a pangnamnamaan. Inkari ni Jehova a Dios nga ipasdekna ti sangalubongan a talna, saan a babaen ti panangtarimaanna iti daytoy a sistema dagiti bambanag, no di ket babaen ti panangipasdekna iti “maysa a baro a daga” a ‘pagtaengan ti kinalinteg.’ (2 Pedro 3:13) Wen, babaen ti Pagarian ti Dios, ti daga agbalinto a natalna, naragsak a pagnaedan, a pangtagiragsakanto nga agnanayon dagiti amin a natulnog a tattao iti biag ken trabaho. Maysa pay, inkari ti Dios a “punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot.” Saan a naibasar dagitoy a kari kadagiti mapagduaduaan a padles dagiti tattao. Imbes ketdi, naibatayda iti mapagtalkan a Sao ti Namarsua, a dina mabalin ti agulbod.—Apocalipsis 21:4; Tito 1:2.