“Banag a Rumbeng a Pagrag-oan ti Amin”
TI Tuvalu, maysa a napintas a pagilian a buklen ti siam nga isla iti Abagatan a Pacifico, ket addaan iti agarup 10,500 a populasion. Kaskasdi, tinarigagayan dagiti lokal a Saksi ni Jehova ti maaddaan kadagiti naibatay-Biblia a publikasion iti bukodda a pagsasao gapu ta nautobda a ‘pagayatan [ti Dios] a maisalakan koma dagiti amin a kita ti tattao ken dumtengda iti umiso a pannakaammo iti kinapudno.’ (1 Timoteo 2:4) Nangyeg daytoy iti karit, gapu ta awan ti diksionario a magun-odan iti pagsasaoda. Idi 1979, maysa a misionero dagiti Saksi ni Jehova idiay Tuvalu ti nangsango iti karit. Nakipagnaedda ken ni baketna iti maysa a pamilia, inadalda ti lokal a pagsasao, ket in-inut a nakaaramidda iti glosario dagiti sasao a Tuvalu. Idi 1984, impablaak ti Watchtower Bible and Tract Society of New York, Inc. ti libro a Mabalinyo ti Agbiag nga Agnanayon iti Paraiso a Daga iti Tuvalu.
Nagsurat ni Dr. T. Puapua, dati a primero ministro ti Tuvalu, ket inapresiarna ti libro nga Agbiag nga Agnanayon. “Maysa manen daytoy a libro a baro ken napateg a nayon ti kangrunaan a ‘tawid’ ti Tuvalu. Rumbeng a maragsakankayo unay iti nagapuananyo—maysa a nagsayaat a gapuanan a mangparang-ay iti espiritualidad dagiti tattao iti daytoy a pagilian. Patiek a maisuratto daytoy a gapuanan iti historia ti Tuvalu maipapan iti panagimaldit kadagiti edukasional a libro. . . . Daytoy [a gapuanan] ket banag a rumbeng a pagrag-oan ti amin.”
Ti listaan dagiti sasao nga inummong ti managipatarus ti nangiturong iti pannakaipablaak ti Tuvalu-Ingles a diksionario idi 1993. Daytoy ti damo a diksionario para iti publiko iti dayta a pagsasao. Iti di pay nabayag, dimmawat iti pammalubos ti National Language Board ti Tuvalu tapno usarenna dayta a mangaramid iti umuna a diksionario iti lokal a pagsasao.
Manipud idi Enero 1, 1989, maimalmalditen ti binulan nga edision ti magasin a Pagwanawanan iti Tuvalu. No basbasaenyo daytoy a magasin iti sabali a pagsasao, apay a diyo usigen ti panid 2 ket kitaenyo no nairaman ti pagsasaoyo a pakaimalmalditan ti Pagwanawanan? Ti panangbasa iti dayta iti bukodyo a pagsasao awan duadua a mangyeg iti kanayonan a rag-o kadakayo.