Talna iti Baro a Milenio?

NAYUSSUAT ti International Year for the Culture of Peace idi Setiembre 14, 1999, idiay Paris ken New York City. Improklamar daytoy ti General Assembly ti United Nations para iti tawen 2000. Sipapasnek nga inyawis ni Federico Mayor, dati a direktor-heneral ti UNESCO, “a mabuangay koma ti maysa a sangalubongan a movimiento a mangitandudo iti natalna ken awan ti kinaranggas a kagimongan.”

Adda pagsasao ti UNESCO a kastoy: “Yantangay kadagiti panunot ti tattao a mangrugi dagiti gubat, nasken a kadagiti panunot ti tattao a mabangon dagiti sarikedked ti talna.” Maitunos iti dayta, panggep ti organisasion ti mangipasdek iti maysa a natalna a kagimongan babaen ti “edukasion, diskusion, ken kooperasion.” Kinuna ni Mr. Mayor a di umdas “ti panagbalin a natalna, uray ti panagbalin a pacifista (kumunkondenar iti gubat ken kinaranggas), no di ket masapul ti panagbalin a mannakikappia.”

Nakalkaldaang ta saan a natalna ti tawen 2000. Nakakadkadlaw iti panawentayo​—agraman kadagiti pasamak iti tawen 2000​—a ti tao dina kabaelan a pasardengen ti gubat ken kinaranggas iti laksid ti panagreggetna a mamagpatingga kadagitoy.

Ngem makapainteres ta agkanaig ti talna ken ti edukasion. Agarup 2,700 a tawenen ti naglabas, impakpakauna ni propeta Isaias: “Amin dagiti annakmo maisuronto kadakuada ni Jehova; ket dakkelto ti talna dagiti annakmo.” (Isaias 54:13) Nasirmatana met ti tiempo inton dagiti tattao iti amin a nasion agturongda iti nasin-aw a panagdayaw ken Jehova a Dios tapno agpaisuro kenkuana. Ania ti resultana? “Pandayendanto dagiti kamkampilanda a pagbalinen a dingding ti arado, ket dagiti pikpikada pandayendanto a kumkumpay; ti maysa a nasion saannanto nga itag-ay ti kampilan a maibusor iti nasion, ket didanto met adalenen iti pannakigubat uray kaano.” (Isaias 2:2-4) Maitunos iti dayta a padto, makiramraman dagiti Saksi ni Jehova iti sangalubongan a trabaho a panangisuro a nakatulong iti minilion a tattao tapno maparmekda ti gura iti sabali a pagilian wenno puli, nga isu ti ramut ti kaaduan a gubat.

Awanton dagiti gubat iti sidong ti Pagarian ti Dios, a mangyeg iti manayon a talna ken talged ditoy daga. (Salmo 72:7; Daniel 2:44) Kalpasanna, matungpalton ti kinuna ti salmista: “Imatanganyo dagiti ar-aramid ni Jehova, no ania dagiti panangdadael nga inaramidna ditoy daga. Pagsardengenna dagiti gubgubat inggana iti ungto ti daga.”​—Salmo 46:8, 9.