‘Gatgatangenyo Kadi ti Nainggundawayan a Tiempo’?
BINALAKADAN ni apostol Pablo dagiti Kristiano idiay Efeso idi umuna a siglo: “Itultuloyyo ti agaluad a siiinget a ti pannagnayo saan a kas kadagiti nakuneng no di ket kas kadagiti masirib a tattao, a gatangenyo ti nainggundawayan a tiempo maipaay iti bagbagiyo, agsipud ta dagiti aldaw dakesda.” (Efeso 5:15, 16) Apay a napateg dayta a balakad? Tapno masungbatan dayta, masapul a matarusantayo ti kasasaad a nakaipasanguan idi dagiti Kristiano iti dayta nagkauna a siudad.
Agdindinamag idi ti Efeso gapu iti naisangsangayan a kinabaknangna, nakaro nga imoralidad, nasaknap a krimen, ken nadumaduma a demonismo. Kanayonanna, maipaspasango dagiti Kristiano sadiay kadagiti pilosopia maipapan iti tiempo. Dagiti saan a Kristiano a Griego idiay Efeso dida patien a maymaysa ti direksion ti tiempo. Nasursuroda iti Griego a pilosopia a maulit-ulit ti biag iti awan patinggana a siklo. No masayang man ti tao ti tiempona iti maysa a siklo ti biag, maabrutna dayta iti sumaruno a siklo. Ti kasta a panangmatmat ti mabalin a nangimpluensia kadagiti Kristiano idiay Efeso a mangyaleng-aleng iti tiempo nga inkeddeng ni Jehova a pannakapasamak dagiti bambanag, agraman ti inkeddengna a tiempo ti panangukom. No kasta, maikanatad ti balakad ni Pablo a ‘gatangen ti nainggundawayan a tiempo.’
Saan a tuktukoyen ni Pablo ti gagangay a tiempo. Ti inusarna a Griego a sao ipasimudaagna ti maysa a naikeddeng a tiempo, maysa a panawen a maitutop iti espesipiko a panggep. Binalakadan ni Pablo dagiti Kristiano idi umuna a siglo nga usarenda a nainsiriban ti tagtagiragsakenda idi a nainggundawayan a tiempo, wenno paborable a panawen, sakbay a lumabas dayta ken agpatingga ti nadibinuan nga asi ken panangisalakan.—Roma 13:11-13; 1 Tesalonica 5:6-11.
Agbibiagtayo met iti kasta a nainggundawayan a periodo ti panawen. Imbes a sayangentayo daytoy dinto maulit a paborable a tiempo babaen ti pananggun-od kadagiti temporario a ragsak nga ituktukon ti lubong, masirib dagiti Kristiano no usarenda ti tiempoda kadagiti “ar-aramid ti nadiosan a debosion” ket iti kasta mapalagda ti relasionda iti Namarsua, ni Jehova a Dios.—2 Pedro 3:11; Salmo 73:28; Filipos 1:10.