Panagadal iti Biblia​—Agpaay Aya Kenka?

“DI MABALIN a basaen no saan a sisasango ti maysa a padi.” Agparang daytoy a pakdaar iti rugi ti sumagmamano a Biblia dagiti Katoliko. “Kas Katoliko, saan a kanayon a makakitakami iti Biblia,” kuna ni Kay Murdy ti Catholic Bible Institute idiay Los Angeles, “ngem nagbalbaliwen ti kasasaad.” Napaliiwna nga iti kanito a mabigbig dagiti Katoliko no kasano a ti Nasantuan a Kasuratan apektaranna ti biagda, “mabisin ken mawawda iti Biblia.”

Maipapan iti daytoy a panagbalbaliw, ti magasin nga U.S. Catholic inadawna ti kinuna ti coordinator iti narelihiosuan nga edukasion a dagiti Katoliko a nakiraman kadagiti klase iti panagadal iti Biblia nariknada a “napaidamanda kas Katoliko, ken nakaad-adu a kinabaknang ti linaon ti Biblia. Kayatda a gun-oden ti dadduma kadagita a kinabaknang a nariknada a nakaikapisanda.”

Aniaman ti kasasaad, ania a “kinabaknang” ti kasapulan a takuaten ti agad-adal iti Biblia? Usigenyo: Kayatyo kadi a maammuan no kasanoyo a daeran dagiti pakaringgoran iti inaldaw a panagbiag? Kasanoyo a mataginayon ti talna iti uneg ti pamiliayo? Apay a nakasaksaknap ti kinasabrak ken ti kababalin a maibusor iti kagimongan? Aniat’ makagapu iti kinaranggas dagiti agtutubo itatta? Ti mapagtalkan a sungbat kadagitoy ken dadduma pay a makaburibor a saludsod ket masarakan iti Sao ti Dios, ti Biblia, ket talaga a maibilang dagita a “kinabaknang,” saan laeng nga agpaay kadagiti Katoliko wenno Protestante no di pay ket kadagiti Budista, Hindu, Muslim, Shinto, uray kadagiti ateista ken agnostiko. Kas kinuna ti salmista, ‘ti sao ti Dios ket pagsilawan iti sakana, ken silaw iti danana.’ Posible met dayta kadakayo.​—Salmo 119:105.