“Dagiti Panangdanar ti Gayyem”

NAKITA ni apostol Pablo a nasken a mailinteg dagiti Kristiano idiay Galacia idi umuna a siglo. Tapno malapdanna ti itataud ti aniaman a sakit ti nakem, insaludsodna: “Ay ket, ngarud, nagbalinak aya a kabusoryo agsipud ta ibagak kadakayo ti kinapudno?”​—Galacia 4:16.

Idi ‘imbagana ti kinapudno,’ saan a nagbalin ni Pablo a kabusorda. Kinaagpaysuanna, nagtignay a maitunos iti prinsipio ti Biblia: “Natalek dagiti panangdanar ti gayyem.” (Proverbio 27:6, King James Version) Ammona a mabalin a masugat ti amor propio dagidiay nagbasol. Ngem pagaammona a no saanna nga ipaay ti disiplina a kasapulan ti managbasol, arigna nga ipapaidamna iti dayta a tao ti ebkas ti ayat ni Jehova a Dios. (Hebreo 12:5-7) Gapuna, kas matalek a gayyem a maseknan unay iti agpaut a pagimbagan ti kongregasion, saan a nagtukiad ni Pablo a mangipaay iti mangilinteg a balakad.

Itatta, tungtungpalen dagiti Saksi ni Jehova ti rebbengenda a ‘mangaramid iti ad-adalan kadagiti tattao iti amin a nasion, . . . nga isuro kadakuada a tungpalenda ti amin a bambanag nga imbilin [ni Jesu-Kristo].’ Iti panangaramidda iti dayta, saan nga ikompromiso dagiti napasnek a Kristiano dagiti kinapudno ti Biblia a mangibutaktak ken mangkondenar kadagiti di umiso a doktrina ken saan a nakristianuan nga ugali. (Mateo 15:9; 23:9; 28:19, 20; 1 Corinto 6:9, 10) Imbes nga agbalinda a kabkabusor a maipuera, iparparangarangda ti pannakaseknan dagiti pudno a gagayyem.

Buyogen ti impaltiing ti Dios a pannakatarus, insurat ti salmista: “No kabilennak koma daydiay nalinteg, maysa dayta a naayat a kinamanangngaasi; ket no tubngarennak koma, lana dayta iti ulo, a saan a kayat a pagkedkedan ti ulok.”​—Salmo 141:5.