Rumbeng Kadi a Naibatay ti Pammati iti Umiso a Pannakaawat?
“Nagadu a ‘relihioso’ a tattao ti sumursurot iti ar-aramid ti relihion tapno laeng maliklikanda ti agpanunot,” insurat ti dean ti maysa a teolohikal a seminario idiay Estados Unidos. “Patienda lattan ti amin uray awan ‘ti pammaneknek,’” innayonna.
IPAKITA dayta a kaaduan a tao nga agkunkuna nga adda relihionda dida pampanunoten a nalaing ti patpatienda wenno no adda naan-anay a nakaibatayan ti pammatida. Di pagsiddaawan a di kayat a pagsasaritaan ti adu a tattao ti maipapan iti relihion.
Anian ta dagiti kaugalian a kas iti panagusar kadagiti narelihiosuan nga imahen ken panangulit-ulit iti naikabesa a kararag ket dida iparegta ti panagpanunot. Dagitoy nga aramid, agraman dagiti makapasiddaaw nga arkitektura, nalabor pannakapinturana a sarming a tawtawa, ken makakayaw a musika, ti pakabigbigan ti relihion ti minilion a tattao. Nupay kunaen ti dadduma a relihion a naibasar iti Biblia ti pammatida, ti mensaheda a ‘mamatikayo ken Jesus ket maisalakankayo’ palag-anenna ti kinapateg ti panagadal iti Biblia. Dagiti dadduma ikasabada ti sosial wenno napolitikaan nga ebanghelio. Ania ti resultana amin dagitoy?
Mainaig iti kasasaad idiay Makin-amianan nga America, maysa a mannurat ti relihion ti nagkuna: “Ti Kinakristiano . . . agbalbalin a parparawpaw, [ken] manmano ti ammo dagiti pasurotna maipapan iti pammatida.” Nakarkaro pay ngem iti dayta, maysa a pollster ti nangdeskribir iti Estados Unidos kas “maysa a nasion dagiti awanan-adal iti Biblia.” Kinapudnona, kastoy met laeng ti kapaliiwan kadagiti dadduma a pagilian nga agraraira ti makunkuna a Kinakristiano. Imbes nga iparegtada ti panagrason, adu met a di Kristiano a relihion ti mangipagpaganetget iti day-eng, ritualistiko a lualo, ken nadumaduma a kita ti panagmennamenna nga iramanna ti mistisismo, imbes a lohikal, makagunggona a panagpanunot.
Ngem iti inaldaw a panagbiag dagiti tattao a di unay mangpampanunot iti kinaumiso ken kinapudno dagiti narelihiosuan a patpatienda, masansan a panunotenda a naimbag ti sabali a bambanag. Diyo kadi dillawen ti tao a metikuloso iti panaggatang iti lugan—a maysa nga aldaw agtungpalto iti pagibellengan—ti agkuna maipapan iti relihionna, ‘No nasayaat dayta kadagiti nagannakko, nasayaat met kaniak’?
No talaga a kayattayo nga ay-aywen iti Dios, saantayo kadi a sukimaten a naimbag ti kinaumiso ti patpatientayo maipapan kenkuana? Adda dagiti dinakamat ni apostol Pablo a relihioso a tattao idi kaaldawanna nga adda “regtada iti Dios; ngem saan a maitunos iti umiso a pannakaammo.” (Roma 10:2) Maiyasping dagitoy iti masuelduan a pintor a nasaet nga agtrabaho tapno mapinturaanna ti maysa a balay ngem saan nga umiso a kolor ti usarenna agsipud ta saan a dimngeg kadagiti bilin ti makimbalay. Mabalin a maay-ayo ti pintor iti trabahona, ngem maay-ayo kadi ti makinkukua?
Ania ti makaay-ayo iti Dios no maipapan iti pudno a panagdayaw? Sumungbat ti Biblia: “Daytoy ket nasayaat ken makaay-ayo iti imatang ti Manangisalakantayo, ti Dios, a ti pagayatanna ket maisalakan koma dagiti amin a kita ti tattao ken dumtengda iti umiso a pannakaammo iti kinapudno.” (1 Timoteo 2:3, 4) Kuna ti dadduma nga imposible a mabirokan ti kasta a pannakaammo kadagiti adu a relihion ita. Ngem panunotenyo—no pagayatan ti Dios a maammuan koma dagiti tattao ti umiso a pannakaammo iti kinapudno, ilimedna kadi dayta kadakuada? Saan sigun iti Biblia, a nangikuna: “No birokem [ti Dios], ipalubosnanto nga isu masarakam.”—1 Cronicas 28:9.
Kasano nga iyam-ammo ti Dios ti bagina kadagidiay sipapasnek a mangsapul kenkuana? Sumungbat ti sumaganad nga artikulo.