Naragsakda ta Nasursuroda ti Agbasa!

ITI dadduma a paset ti Solomon Islands, saan a makabasa ti agingga 80 a porsiento a Saksi ni Jehova. Gapu iti dayta, saan laeng a nalimitaran ti pannakipasetda kadagiti linawas a gimong ti kongregasion no di pay ket marigatanda a mangisuro iti sabsabali dagiti kinapudno maipapan iti Pagarian. Mabalin kadi a talaga a makasursuro nga agbasa ti maysa a di nageskuela?

Ti broshur nga Apply Yourself to Reading and Writing, nga impablaak dagiti Saksi ni Jehova, ket maus-usar iti panangisuro nga agbasa iti nganngani amin a kongregasion dagiti Saksi ni Jehova iti intero a Solomon Islands. Ipakita dagiti sumaganad a kapadasan no kasano a natulongan a rumang-ay ti ginasut a tattao gapu iti daytoy a programa. Napatpateg pay, nasaysayaat ti panangikasabada iti pammatida gapu ta ammodan ti agbasa.​—1 Pedro 3:15.

Maysa a misionera a naibaon iti kongregasion nga addaan iti nasurok a sangagasut nga agibumbunannag iti Pagarian nadlawna nga iti linawas a panagadal iti Biblia a mausar Ti Pagwanawanan, manmano ti addaan iti kopia ti kasta a magasin ken basbassit pay ketdi ti agkomento. Ti makagapu? Dida ammo ti agbasa. Idi naipakaammo iti kongregasion a nayurnos ti maysa nga eskuelaan a mangisuro no kasano ti agbasa ken agsurat, siraragsak a nagboluntario a mangisuro ti misionera. Manmano laeng ti timmabuno idi damo, ngem di nagbayag, immatender ti nasurok nga 40 a tattao a nadumaduma ti edadda.

Ania dagiti resultana? Insalaysay ti misionera: “Di nagbayag kalpasan a nangrugi ti klase, adda naminsan nga alas sais ti bigat a nakitiendaak iti taraon dagiti misionero. Nakitak sadiay ti dadduma kadagiti estudiante, uray dagiti ubbing, nga aglaklako kadagiti niog ken nateng. Apay? Gapu ta kayatda ti maaddaan iti umdas a kuarta a paggatang iti lapis ken papel nga usarenda iti klase! Maysa pay, makagun-odda ngamin iti bukodda a kopia ti Pagwanawanan a magasin no agatenderda iti dayta a klase.” Innayonna: “Ita, bayat ti Panagadal iti Pagwanawanan ti kongregasion, agpada a makipaspaset dagiti ubbing ken nataengan, ket nabiag ti panagadalmi.” Nangnangruna a naragsakan daytoy a misionera idi uppat kadagiti estudiante ti nagkiddaw no mabalindan ti mangasaba iti publiko gapu ta, sigun kadakuada, “saandan a mabuteng.”

Saan laeng a nasursuro dagiti estudiante ti agbasa ken agsurat. Kas pagarigan, adu a tawen a maseknan ti kongregasion iti babai nga asawa ti Saksi. Barsaken ti babai dagiti tattao no masair uray bassit laeng ken pang-orenna pay iti kayo ti dadduma a babbai. No pasaray kumuyog ken ni lakayna a tumabuno kadagiti Nakristianuan a gimong, naimon unay isu nga agantipara iti de kolor ni lakayna tapno dina ibaga a kumitkita daytoy kadagiti sabali a babbai.

Ngem di nagbayag kalpasan a nangrugi ti klase, sipapakumbaba nga inyimtuod daytoy a babai: “Mabalinko kadi ti umatender iti klase?” Napatgan ti kiddawna. Sipud idin, awan pulos ti nalangananna a klase wenno gimong ti kongregasion. Nagporsegi kadagiti leksionna iti panagbasa ken nakaskasdaaw ti panagrang-ayna, isu a naragsakan unay. Kastoy ti simmaruno a kiddawna: “Mabalinko kadi ti mayadalan iti Biblia?” Siraragsak nga inyadalan ni lakayna, ket nagtultuloy a rimmang-ay ti abilidadna nga agbasa ken agsurat ken ti pannakaammona iti Biblia.

Para iti maysa nga agtawen iti 50 a di pulos nakaiggem iti lapis, dakkel a karit uray ti panangisurat kadagiti letra ti alpabeto. Agkalio dagiti ramay ti dadduma gapu iti natalmeg a panagsuratda no rugrugida pay laeng ti agadal. Ngem kalpasan ti sumagmamano a lawas a panagsuratda, makaisem ti dadduma nga estudiante nga agkuna: “Nalag-anen ti panagsuratko!” Maragsakan met ti agisursuro no makitana a rumangrang-ay dagiti estudiantena. Kinuna ti maysa nga instruktor: “Ti panangisuro iti maysa a klase ket dakkel a rag-o, ken masansan nga agpapalakpak dagiti estudiante iti ngudo ti klase kas ebkas ti napudno nga apresasionda iti daytoy nga urnos a naggapu ken Jehova.”

Agpapada ita a maragsakan dagiti misionero ken dagiti Saksi a nakasursuro nga agbasa ken agsurat. Apay? Gapu ta mabalindan nga usaren ti abilidadda nga agbasa ken agsurat a mangidayaw ken ni Jehova.

[Dagiti Ladawan iti panid 8, 9]

Dagiti ubbing ken nataengan agpada nga apresiarenda ti urnos a panangisuro nga agbasa ken agsurat