“Ammoyo Kadi No Apay nga Isublik ti Kuartayo?”

‘TALAGA a kasapulak ti kuarta!’ napanunot ni Nana, agsolsolo nga ina ti tallo a babbarito idiay Kaspi, iti Republika ti Georgia. Maysa nga agsapa, pimmayso ti tarigagayna a makasapul iti kuarta. Nakasarak iti 300 a lari (150 US dollar) iti asideg ti estasion ti polisia. Awan ti tao iti aglikmut. Dakkel a kuarta dayta. Kinapudnona, dipay nakakita ni Nana iti 100 a lari iti unos ti lima a tawen sipud idi nagbalin ti lari kas pannakakuarta ti pagilian. Saan a makaurnong dagiti gagangay a komersiante iti kasta a kantidad iti sumagmamano laeng a tawen a panagtrabaho.

‘Ania ti serbina daytoy a kuarta no madadael met ti pammati, nadiosan a panagbuteng, ken espiritualidadko?’ napanunot ni Nana. Napatanorna dagita a Nakristianuan a galad, nga inibturanna pay dagiti nakaro a pannakaidadanes ken pannakakabkabil gapu iti patpatienna.

Idi agturong iti estasion ti polisia, nakita ni Nana ti lima a polis nga adda sapsapulenda. Ammona a sapsapulenda ti kuarta, isu nga inasitganna ida ket kinunana: “Adda kadi napukawyo?”

“Kuarta,” insungbatda.

“Mano?”

“Tallo gasut a lari!”

“Nasarakak ti kuartayo,” kinuna ni Nana. Kalpasanna, insaludsodna: “Ammoyo kadi no apay nga isublik ti kuartayo?” Saanda nga ammo.

“Gapu ta maysaak a Saksi ni Jehova,” intuloyna. “No saan, diak koma nga isubli ti kuartayo.”

Ti hepe ti polisia a nakapukaw iti kuarta inikkanna ni Nana iti 20 a lari kas panagyaman iti kinamapagpiaranna.

Nagsaknap a dagus dayta a pasamak iti intero a distrito ti Kaspi. Iti simmaganad nga aldaw, maysa nga agdaldalus nga empleada ti rimmuar iti estasion ti polisia ket kinunana ken ni Nana: “Kanayon nga adda literaturayo iti opisina [ti hepe]. Ita, nalabit nga ad-adda nga ipategna dagita.” Kinuna pay ketdi ti maysa a polis: “No amin a tao ket Saksi ni Jehova, asino pay koma ti agaramid iti krimen?”