Malagipyo Kadi?

Naragsakankayo kadi a nangbasa kadagiti kallabes a ruar Ti Pagwanawanan? Bueno, kitaenyo no masungbatanyo dagiti sumaganad a saludsod:

• Ania ti empatia, ken apay a nasken a sukayen dayta dagiti Kristiano?

Dayta ti abilidad a mangikabil iti bagi iti sasaaden ti sabali, kas iti pannakarikna iti pusotayo ti saem ti sabali a tao. Nabalakadan dagiti Kristiano a mangipakitada iti ‘pannakipagmaymaysa ti rikna, nainkabsatan a panagayat, ken pannakipagrikna.’ (1 Pedro 3:8) Nangipakita ni Jehova iti ulidan a surotentayo iti panangiparangarang iti empatia. (Salmo 103:14; Zacarias 2:8) Maparayray ti pannakipagriknatayo babaen ti panagimdeng, panagpaliiw, ken panangusar iti imahinasion.​—4/15, panid 24-6.

• Tapno magun-od ti pudno a kinaragsak, apay a masapul nga umun-una ti pannakapaimbag iti naespirituan sakbay ti naan-anay a pannakapaimbag dagiti pisikal a depekto?

Naladingit, napnuan iti parikut ti adu a nakaradkad a tattao. Iti sabali a bangir, adu ita a Kristiano nga addaan iti pisikal a depekto ti naragsak nga agserserbi ken ni Jehova. Dagidiay mapaimbag iti naespirituan manamnamada a maikkatto dagiti pisikal a depektoda idiay baro a lubong.​—5/1, panid 6-7.

• Iti Hebreo 12:16, apay a nayasping ni Esau iti mannakiabig?

Ti salaysay ti Biblia ipamatmatna a nangipakita ni Esau iti mentalidad a naipamaysa kadagiti madagdagus a gunggona ken panangtagibassit kadagiti sagrado a banag. No ipalubos ti asinoman ita a tumanor kenkuana ti kasta a kita ti panagpampanunot, mabalin a mangiturong dayta iti serioso a panagbasol, kas iti pannakiabig.​—5/1, panid 10-11.

• Siasino ni Tertullian, ken apay a limmatak?

Maysa a mannurat ken teologo a nagbiag idi maikadua ken maikatlo a siglo K.P. Limmatak gapu iti adu a sursuratna a nangikaluya kadagiti agkunkuna a Kristiano. Kabayatan dayta, nangyam-ammo kadagiti kapanunotan ken pilosopia a nakaibatayan dagiti ballikug a sursuro, kas iti Trinidad.​—5/15, panid 29-31.

• Apay a saan nga interamente a dagiti genetiko a pakabuklan ti makagapu iti panagsakit, kababalin, ken ipapatay ti tao?

Ibaga dagiti sientista a nalawag nga adda ti genetiko a makagapu iti nagduduma a sakit ti tao, ken patien ti dadduma a dagiti gene ti mangikeddeng iti kababalintayo. Ngem ti Biblia ilawlawagna ti namunganayan ti tao, agraman no kasano a nagsagaba ti sangatauan gapu iti basol ken kinaimperpekto. Nupay nalabit maysa ti gene a mangsukog iti personalidad, kangrunaan met a makagapu ti kinaimperpekto ken ti aglawlawtayo.​—6/1, panid 9-11.

• Kasano a ti maysa a pirsay ti papiro a nasarakan idiay Oxyrhynchus, Egipto, nangipaay iti lawag maipapan iti pannakausar ti nagan ti Dios?

Daytoy a pirsay ti Job 42:11, 12 manipud iti Griego a Septuagint ket naglaon iti Tetragrammaton (ti uppat a Hebreo a letra ti nagan ti Dios). Kanayonan daytoy a pammaneknek a ti nagan ti Dios iti Hebreo ket agparang iti Septuagint, a masansan a pagadawan dagiti mannurat ti Kristiano a Griego a Kasuratan.​—6/1, panid 30.

• Ania dagiti mabuybuya ita nga ay-ayam a nayasping iti naranggas ken makapapatay a panaglalaban dagiti gladiador ti Emperio ti Roma?

Ti nabiit pay a pabuya iti Colosseum idiay Roma, Italia, nangipamatmat iti moderno a katupag babaen ti panangiraman kadagiti videotape ti toreo, propesional a boksing, lumba dagiti kotse ken motorsiklo, ken panaglalaban dagiti agbuybuya iti dadduma a moderno nga ay-ayam. Nabigbig dagiti nagkauna a Kristiano a kagura ni Jehova ti kinaranggas wenno dagiti naranggas a tattao, ket kagura met dagiti Kristiano ita. (Salmo 11:5)​—6/15, panid 29.

• Bayat nga igaedtayo ti agbalin nga epektibo a mannursuro, ania ti masursurotayo iti ulidan ni Esdras?

Intampok ti Esdras 7:10 ti uppat a banag nga inaramid ni Esdras, bambanag nga ikagumaantayo a tuladen. Kunana: “Ni met laeng Esdras [1] insaganana ti pusona nga [2] umuman iti linteg ni Jehova ken [3] mangaramid iti dayta ken [4] mangisuro idiay Israel iti alagaden ken hustisia.”​—7/1, panid 20.

• Iti ania a dua a pakaar-aramidan ti aktibidad a mayanatup nga agdalungdong dagiti Kristiano a babbai?

Ti maysa ket iti pagtaengan. Ti panagdalungdongna ket mangyanninaw iti panangbigbigna a ni lakayna ti makinrebbeng a mangidaulo iti kararag ken mangisuro iti Biblia. Ti maikadua ket iti kongregasion. Bigbigenna a dagiti bautisado a kakabsat a lallaki ti inautorisaran ti Kasuratan a mangisuro ken mangidaulo. (1 Corinto 11:3-10)​—7/15, panid 26-7.

• Apay a bigbigen dagiti Kristiano a ti yoga ket saan laeng a basta ehersisio ken napeggad dayta?

Ti panggep ti yoga kas maysa a pagalagadan isu ti panangiturongna iti tao tapno maikaykaysa iti mannakabalin nga espiritu. Maikontra iti bilin ti Dios, iraman ti yoga ti panangisardeng iti aktibo a panagandar ti panunot. (Roma 12:1, 2) Ti yoga mabalin nga isarangna ti maysa a tao kadagiti peggad ti espiritismo ken okultismo. (Deuteronomio 18:10, 11)​—8/1, panid 20-2.