“Sumiribka iti Masanguanam”

“Nakaay-ay-ay ti kaaduan a nataengan gapu iti wagas a panangusarda iti biagda idi ubbingda pay,” kinuna ni Jean de La Bruyère, maysa a Pranses a mannalaysay idi maika-17 a siglo. Wen, mabalin a di makaikeddeng ti awan disposisionna nga agtutubo, ket makarikna iti di pannakapnek ken panagbabawi. Iti sabali a bangir, nalabit itultuloy ti nasubeg nga agtutubo ti minamaag nga aramidna, a mangikkatto iti rag-ona inton nataengan. Aniaman kadagita, ti di panagaramid iti umiso ken ti panagaramid iti di umiso mabalin a mangiturong iti nakaay-ay-ay a kasasaad.

Kasano a maliklikan ti kasta a pagbanagan? Iti ballaagna maibusor iti inuubingan a kinaawan ti disposision, balakadan ti Sao ti Dios dagiti agtutubo: “Lagipem, itan, ti Naindaklan a Namarsuam kadagiti aldaw ti kinaagtutubom, sakbay nga umay dagiti makadidigra nga aldaw, wenno dimtengen dagiti tawen inton kunaem: ‘Awan pakaragsakak kadakuada.’” (Eclesiastes 12:1) No maysaka nga agtutubo, mangaramidka kadagiti positibo nga addang a mangammo iti maipapan iti “Naindaklan a Namarsuam” bayat nga ubingka pay.

No kasta, kasano a ti Biblia tulonganna dagiti agtutubo a mangliklik iti inuubingan a kinamaag? Kunaenna: “Imdengam ti pammatigmaan ket awatem ti disiplina, tapno iti kasta sumiribka iti masanguanam.” (Proverbio 19:20) Silalawag met nga ipakita ti Biblia a mangyeg iti saem ti panangilaksid iti nadiosan a sirib kas resulta ti di panangikankano wenno panagrebelde dagiti agtutubo, wenno ti siasinoman, aniaman ti edadda. (Proverbio 13:18) Ngem ti panangipangag kadagiti bilin ti Dios agresulta iti “kaatiddog ti al-aldaw ken tawtawen ti biag ken talna,” biag a makapnek ken makagunggona.​—Proverbio 3:2.