Dagiti Panagregget a Mangitandudo Kadagiti Nasayaat a Moral a Pagalagadan
Idi arinunos ti tawen 2001, dagiti dumdumngeg iti sangapagilian nga anunsio ti Radio Mozambique nangngegda daytoy a pakaammo:
“Ti presidente ti Republika binisitana dagiti pasilidad ti sanga nga opisina dagiti Saksi ni Jehova idiay Maputo. Imparegtana iti daytoy narelihiosuan a kongregasion a parayrayenda ti panagreggetda a mangitandudo kadagiti nasayaat a moral a pagalagadan kadagiti pamilia ken mangedukar kadagiti nataengan babaen kadagiti programada a mangisuro no kasano ti agbasa ken agsurat. Agarup 10,000 a tattao ti nagunggonaanen kadagitoy a programa. Sigun ken Presidente Chissano, makomendaran dagitoy a programa, agsipud ta makatulongda unay iti kagimongan iti panangsolbar kadagiti parikut iti edukasion a sangsanguen pay laeng ti pagilian.”
Nagtultuloy ti anunsio babaen ti sumaganad a nairekord a paset ti palawag ti presidente: “Makaparegta kadakami a makita nga adu ti aginteres nga agadal nga agbasa ken agsurat . Makitatayo nga adda dagiti ordinario a sektor a mayat a tumulong kadatayo a mangkissay iti nangato a bilang dagiti saan a makabasa ken makasurat. Gapuna, kayatko nga iparegta kadagiti Saksi ni Jehova a parayrayenda dagiti programada a mangisuro, iti aniaman a lenguahe. Ti talaga a napateg isu ti pannakaedukar ket iti kasta nalaklaka a makapagsasarita dagiti tattao ken iti masanguanan addanto dakdakkel a pannakipaset iti panangisuro.”
Dagiti Saksi ni Jehova idiay Mozambique mangisursuroda iti panagbasa ken panagsurat iti 850 a luglugar iti intero a pagilian tapno dagiti tattao mabasada a mismo ti Sao ti Dios. Kanayonanna, mangidadauloda iti agarup 50,000 a libre a panagadal iti Biblia iti kada lawas. Amin dagitoy ket paset ti sangalubongan a programa a panangisuro iti Biblia a dumandanon itan iti 235 a pagilian. (Mateo 24:14) Mabalinyo met ti magunggonaan iti daytoy a programa. Dikayo koma bumdeng nga umasideg kadagiti Saksi ni Jehova iti lugaryo.