Ti Panangted a Nalablabes Ngem iti Kabaelan

“MABALIN nga awagandak iti agpalpalama; saanak a masair. Agpalpalamaak maipaay ken Jesus.” Dagita a prangka a sasao ti maysa a Protestante a ministro itampokda ti kontrobersia mainaig iti panagur-or iti pondo dagiti relihion. Agparang a makapagtultuloy laeng dagiti organisado a relihion babaen ti dakkel a pinansial a suporta. Kasapulan ti pangsueldo, masapul a maibangon ken mamantener dagiti templo, kasapulan a maponduan ti panagibanghelio. Kasano a mapataud ti kasapulan a kuarta?

Adu a relihion ti mangpataud iti dayta babaen ti apagkapullo.a “Ti panagkolekta iti apagkapullo ti pamay-an ti Dios tapno maponduan ti pagarianna ditoy daga,” kuna ti ebanghelista a ni Norman Robertson. “Dayta ti pamay-an ti Dios a mangpataud iti kuarta tapno maikasaba ti Ebanghelio.” Saan a mabain ni Robertson a mangipalagip kadagiti pasurotna maipapan iti obligasionda a mangted, nga impaganetgetna: ‘Mangtedka iti apagkapullo saan a gapu ta kabaelam. Dayta ket maysa a panagtulnog. Nalawag a pananglabsing kadagiti bilin ti Dios ti saan a panangted iti apagkapullo. Panagtakaw dayta.’​—Tithing​—God’s Financial Plan.

Umanamongkayo la ketdi a ti panangted ket nasken a paset ti Nakristianuan a panagdayaw. Nupay kasta, makapadismaya kadi kadakayo no kanayon ti panagkiddawda iti kuarta, a nalabit makapadagsen pay ketdi? Ti teologo idiay Brazil a ni Inácio Strieder inakusarna dagiti relihion nga agur-ur-orda iti apagkapullo tapno “masolbarda dagiti parikut ti institusionda” ken inawaganna dagita nga aramid kas “ilegal, panagabuso, ken isisiasi iti teolohia.” Kastoy ti napaliiwna a resulta: “Dagiti awan panggedanna a tattao, balo, agtataeng kadagiti napanglaw a komunidad, ken dagiti saan a managpanunot ipapanda a binaybay-an ida ti Dios ken obligadoda a mangted iti dakkel iti ‘mangaskasaba’ nga uray la agbisin dagiti mismo a pamiliada.”

Nalabit a mapanunotyo: ‘Dagiti kadi relihion a mangikalkalikagum iti apagkapullo siuumiso nga iyap-aplikarda ti Kasuratan? Wenno saan ngata nga us-usaren ti dadduma a relihion ti panagbuteng iti Dios tapno makaalada iti kuarta iti arbanda? Talaga kadi a namnamaen ti Dios a mangtedtayo iti nalablabes ngem iti kabaelantayo?’

[Footnote]