Salsaludsod Dagiti Agbasbasa

Kayat kadi a sawen ti Apocalipsis 20:8 a nakaad-adunto dagiti tattao a maallilaw ni Satanas iti maudi a pannubok?

Deskribiren ti Apocalipsis 20:8 ti maudi nga iraraut ni Satanas kadagiti tattao nga agnanaed ditoy daga iti ngudo ti sangaribu a tawen a panagturay ti Mesianiko a Pagarian. Maipapan ken Satanas, kuna ti bersikulo: “Rummuarto tapno iyaw-awanna dagidiay nasion nga adda iti uppat a suli ti daga, da Gog ken Magog, tapno urnongenna ida a sangsangkamaysa maipaay iti gubat. Ti bilang dagitoy ket kas iti darat ti baybay.”

Uray no moderno unayen dagiti pamay-an ken instrumento dagiti sientista, awan latta ti makaammo iti kaadu wenno bilang ti “darat ti baybay.” Maikuna ngarud a dayta a pannao itakderanna ti di ammo, di masnup a bilang. Ngem ipasimudaagna kadi ti nagdakkel, sobra ti kaaduna, di mailadawan a bilang, wenno kaipapananna laeng ti di ammo ngem adu, wenno dakkel a bilang?

Iti Biblia, nadumaduma ti pannakaaramat ti pannao a “kas iti darat ti baybay.” Kas pagarigan, kastoy ti mabasatayo iti Genesis 41:49: “Nagtultuloy a nagipempen ni Jose iti bukbukel a nakaad-adu unay, kas iti darat ti baybay, agingga a kamaudiananna simmukoda a mangbilang iti dayta, agsipud ta awanan idin iti bilang.” Naipaganetget ditoy ti di pannakabilang. Kasta met, kinuna ni Jehova: “No kasano a ti buyot ti langlangit saan a mabilang, ken saan met a masukat ti darat ti baybay, kastanto ti panangpaaduk iti bin-i ni David nga adipenko.” No kasano a di mabilang dagiti bituen iti langit ken darat iti baybay, kastanto met ti kaitungpalan ti kari ni Jehova ken David.​—Jeremias 33:22.

Ti pannao a “darat ti baybay” masansan a tukoyenna ti maysa a banag nga umdas ken nakakadkadlaw ti kaadu wenno kadakkelna. Nagdanag iti kasta unay dagiti Israelita idiay Gilgal idi naguummong idiay Micmas ti buyot dagiti Filisteo, “a kas kadagiti binukel ti darat nga adda iti aplaya ti kaaduda.” (1 Samuel 13:5, 6; Uk-ukom 7:12) Ket “ti Dios nagtultuloy a nangted ken Solomon iti sirib ken pannakaawat iti dakkel unay a rukod ken iti kinalawa ti puso, kas iti darat nga adda iti aplaya.” (1 Ar-ari 4:29) Nupay adu ti tuktukoyen ti tunggal maysa kadagita a pagarigan, nakedngan latta dayta.

Ti “darat ti baybay” mabalin a kaipapananna met ti di ammo a bilang, a di naipasimudaag ti kaaduna. Kinuna ni Jehova ken Abraham: “Paaduekto ti bin-im kas kadagiti bituen ti langlangit ken kas kadagiti binukel ti darat nga adda iti aplaya.” (Genesis 22:17) Idi inulitna daytoy a kari ken ni Jacob nga apoko ni Abraham, inaramat ni Jehova ti pannao a ‘dagiti binukel ti tapok ti daga,’ a sigun ken Jacob, kas “kadagiti binukel ti darat iti baybay.” (Genesis 28:14; 32:12) Kas kaitungpalan dayta a kari, malaksid ken Jesu-Kristo, agdagup iti 144,000 ti “bin-i” ni Abraham, nga inawagan ni Jesus iti “bassit nga ipastoran.”​—Lucas 12:32; Galacia 3:16, 29; Apocalipsis 7:4; 14:1, 3.

Ania ti maadaltayo kadagitoy a pagarigan? Ti pannao a “kas iti darat ti baybay” saanna a kanayon a kaipapanan ti di nakedngan, nagdakkel a bilang; saan met a kanayon a mausar a mangdeskribir iti maysa a banag a nakaad-adu wenno sobra ti kaaduna. Masansan nga itakderanna ti di ammo ngem dakkel a bilang. Nainkalintegan ngarud a kunaen a dagiti nasukir a tattao a dumasigto ken Satanas iti maudi nga irarautna iti ili ti Dios ket saan a sobra ti kaaduda, ngem dakkel ti bilangda ken umdas ti kaaduda a mangpataud iti peggad. Ngem awan pay ti makaammo ita iti bilangda.