Kasano Kapateg ti Naayat a Kinamanangngaasi?
“TI MATARIGAGAYAN a banag iti naindagaan a tao isu ti naayat a kinamanangngaasina,” kuna ti Biblia. (Proverbio 19:22) Wen, pudno a makaay-ayo dagiti aramid a kinamanangngaasi a tinignay ti ayat. Ngem ti “naayat a kinamanangngaasi” a termino iti Biblia tuktukoyenna ti kinamanangngaasi a mabalin a naibatay iti naipasdek a relasion, kas daydiay naibatay iti immuna a tignay ti kinamanangngaasi maipaay iti sabali. Gapuna, iramanna ti anag a kinasungdo.
Saan a nasukay ni Ari Jehoas ti Juda daytoy a matarigagayan a galad. Nakautang iti dakkel a naimbag a nakem iti ikitna ken iti ulitegna a ni Jehoiada. Idi agedad ni Jehoas iti nakurang a maysa a tawen, ti nadangkes nga apongna pinagbalinna ti bagina a reyna ket pinapatayna ti amin a lallaki a kabsat ni Jehoas, nga agtawid iti trono. Ngem napaay a nangpatay iti ubing a ni Jehoas agsipud ta siaayat nga inlemmeng ti ikit ken ulitegna. Insuroda met kenkuana ti Linteg ti Dios. Idi agtawen iti pito ni Jehoas, inusar ti ulitegna ti autoridadna kas nangato a padi tapno mapapatay ti nadangkes a reyna ken tapno maisaad ni Jehoas kas ari.—2 Cronicas 22:10–23:15.
Nasayaat ti panagturay ni ubing a Jehoas kas ari. Ngem idi matay ti ulitegna, nagdayaw ni Jehoas kadagiti idolo. Imbaon ti Dios ni Zacarias, nga anak ni Jehoiada, tapno ballaaganna ni Jehoas iti panagapostasiana. Imbilin ni Jehoas a maubor ni Zacarias. Anian a nagkaro a panangipakita iti kinaawan panangipateg iti pamilia a nakautanganna iti dakkel!—2 Cronicas 24:17-21.
Kuna ti Biblia: “Ni Jehoas nga ari saanna a nalagip ti naayat a kinamanangngaasi a winatwat maipaay kenkuana ni Jehoiada nga ama [ni Zacarias], iti kasta pinapatayna ti anakna.” Idi agbugbugsot, kinuna ni Zacarias: “Kitaen koma ni Jehova dayta ket singirenna dayta.” Kas kaitungpalan ti sasao ni Zacarias, nakaro a nagsakit ni Jehoas ken pinapatay dagiti bukodna nga adipen.—2 Cronicas 24:17-25.
Imbes nga agbalin a kas ken ni Ari Jehoas, nasayaat ti masakbayan ti amin a mangsurot iti daytoy a balakad: “Ti met laeng naayat a kinamanangngaasi ken kinapudno saandaka koma a panawan. . . . Ket iti kasta makasarakka iti pabor . . . iti imatang ti Dios ken ti naindagaan a tao.”—Proverbio 3:3, 4.