Salsaludsod Dagiti Agbasbasa
Mabasa kadi ni Satanas a Diablo ti isip ti tao?
Nupay saantayo a naan-anay a masigurado, agparang a di kabaelan a basaen ni Satanas wenno dagiti demoniona ti isiptayo.
Usigenyo dagiti mangiladawan a nagan ni Satanas. Naawagan kas Satanas (Bumusbusor), Diablo (Mammardaya), Serpiente (katupag ti Manangallilaw), Mannulisog, ken Managulbod. (Job 1:6; Mateo 4:3; Juan 8:44; 2 Corinto 11:3; Apocalipsis 12:9) Awan kadagitoy a mangiladawan a nagan ti mangipamatmat a mabasa ni Satanas dagiti isip.
Ngem maisupadi kenkuana, nadeskribir ni Jehova a Dios kas “ti manangsukimat kadagiti puso.” (Proverbio 17:3; 1 Samuel 16:7; 1 Cronicas 29:17) “Awan ti parsua a saan a sibabatad iti imatang [ni Jehova],” kuna ti Hebreo 4:13, “no di ket amin a bambanag lamolamoda ken sipapanayagda a naiparang kadagiti mata daydiay pagidatagantayo.” Saan a pagsiddaawan a ni Jehova inikkanna ni Jesus nga Anakna iti abilidad a mangsukimat kadagiti puso. Kinuna ni napagungar a Jesus: “Siak daydiay mangsukimat kadagiti bekkel ken puspuso, ket mangtedakto iti tumunggal maysa kadakayo sigun kadagiti aramidyo.”—Apocalipsis 2:23.
Saan nga ibaga ti Biblia a kabaelan ni Satanas a sukimaten dagiti puso ken isip dagiti tattao. Napateg daytoy a banag yantangay impanamnama kadatayo ni apostol Pablo a ‘saan nga ignorante dagiti Kristiano kadagiti gakat ni Satanas.’ (2 Corinto 2:11) Gapuna, ditay rumbeng a pagdanagan a baka adda naisangsangayan nga abilidad ni Satanas a ditay ammo a pulos.
Kaskasdi, dina kayat a sawen a saan a makita ti Kabusor dagiti pagkapuyantayo. Sinigsiglon a naadal ni Satanas ti kababalin ti tao. Saan a kasapulan a mabasana dagiti isip tapno maammuanna no ania ti kababalintayo, no ania ti paglinglingayan a magustuantayo, wenno no ania a bambanag ti kaykayattayo a saritaen, ken dadduma pay. Dagiti ekspresion ti rupa ken posturatayo mabalin met a mangtedda iti pangsaripatpatan no ania ti pampanunoten wenno riknatayo.
Ngem kangrunaanna, us-usaren ni Satanas ti isu met laeng a pamay-an nga inusarna idi iti minuyongan ti Eden—panagulbod, panangallilaw, ken di umiso a pannakaammo. (Genesis 3:1-5) Nupay saan a rumbeng a pagamkan dagiti Kristiano no mabasa met laeng ni Satanas ti isipda, adda panggapuanda a maseknan maipapan kadagiti kapanunotan a nalabit ikagumaan nga imula ni Satanas iti isipda. Kayatna a dagiti Kristiano agbalin a “rinuker ti panunotda ken naawanan iti kinapudno.” (1 Timoteo 6:5) Saan a pagsiddaawan a nangpataud ti lubong ni Satanas iti nakaad-adu a makadadael nga impormasion ken paglinglingayan. Tapno madaeranda daytoy a panangdadael, masapul a salakniban dagiti Kristiano ti isipda babaen ti panangisuotda iti “kabal ti ulo.” (Efeso 6:17) Maaramidda dayta babaen ti panangpunnoda iti isipda kadagiti kinapudno iti Biblia ken liklikanda dagiti di nesesita a pannakinamin kadagiti dakes nga elemento ti lubong ni Satanas.
Nabileg a kabusor ni Satanas. Ngem ditay rumbeng a pagbutngan ti Diablo wenno dagiti demoniona. Impasigurado ti Santiago 4:7: “Busorenyo ti Diablo, ket isu agtalawto kadakayo.” No surotentayo dayta a balakad, mabalintayo a kunaen, kas iti kinuna ni Jesus, nga awan pannakabalin ni Satanas kadatayo.—Juan 14:30.