Kadawyan La Kadi Wenno Panagpasuksok?

TI dadduma a kolehio idiay Poland, kadawyan kadagiti estudiante ti agkolekta iti kuarta nga igatangda iti sagut para kadagiti mannursuroda, a mangnamnamada iti nasayaat a marka no ageksamenda. Di pagsiddaawan a naipasango iti narikut a situasion ti maysa nga agtutubo a Kristiano nga agnagan Katarzyna. “Mangtedak kadi iti kuarta wenno saan?” inyimtuodna. Inkalintegan dagiti kapatadanna: “Kadawyan dayta. Awan ti mapukawmo, dakkel pay ketdi ti magun-odmo, isu nga apay nga agduaduaka?”

“Aminek nga iti umuna a tawen ti panageskuelak, timmulongak a nagkolekta iti kuarta,” binigbig ni Katarzyna. “Ngem naamirisko idi agangay a no aramidek dayta, supsuportarak ti panagpasuksok, a kondenaren ti Biblia.” Nalagipna dagiti kasuratan a mangipakita a di pulos anamongan ni Jehova ti panagpasuksok. (Deuteronomio 10:17; 16:19; 2 Cronicas 19:7) Kuna ni Katarzyna: “Agpayso a naglaka ti tumulok iti panangpilit dagiti kapatada. Pinampanunotko dayta ket manipud idi saanakon a pulos nakiraman iti dayta nga aramid.” Kadagiti naglabas a tallo a tawen, iti laksid ti pananglais ti dadduma nga estudiante, inlawlawagna kadagiti dadduma a saan a makipaset kadagitoy a panagkolekta iti “sagut” gapu kadagiti naibatay-Biblia a patpatienna.

Adda dagiti mangibaga a managimbubukodan ken saan a mannakibagay ni Katarzyna. “Didak latta maawatan ti dadduma,” kunana. “Iti sabali a bangir, maragsakanak ta adu dagiti mangraem iti panangmatmatko.” Nagdinamag ni Katarzyna kas maysa a Saksi ni Jehova, a mangsalsalimetmet kadagiti prinsipio ti Biblia iti inaldaw a panagbiagna.